Pōmaikaʻi ko Hawaiʻi moku.
ʻO ia aʻela kekahi poʻo nūhou o kēia lā, ka lā 12 o ʻOkakopa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.
Ma muli o ke kōkua ʻana o kahi ʻona biliona, ua hāʻawi manawaleʻa ʻia he hoʻokahi miliona uhi maka no ka poʻe o Hawaiʻi moku i mea e emi ai ka laha ʻana o ka mea hoʻomaʻi COVID-19. ʻO Marc Benioff ka inoa o ua ʻona biliona lā, a na ke Kulanui o Kaleponi ma Kapalakiko i hāʻawi manawaleʻa, ʻoiai ʻo ia kahi o ke Kikowaena Lāʻau Meaola Māiki ʻo Benioff. He hale ko Benioff ma ka mokupuni ʻo Hawaiʻi a ʻo ia kekahi lālā o ka hui a ka Meia Harry Kim i hoʻokumu ai no ka hana ʻana i mea e laha ʻole ai ke COVID-19.
ʻĀhaʻi aku nei nā Lakers i ka lanakila a lilo aku nei ka inoa moho pōpō hīnaʻi iā lākou ma ka helu ʻai he 106 i ke 93 a Miami. ʻO ke ono ia o ka pāʻani. Ua maikaʻi wale ka hana a Lebron James, he 28 āna ʻai, he 14 lālau, a he 10 hānai. A ʻo Anthony Davis, he 19 āna ʻai, a he 15 lālau. He mea ia inoa moho i piha hauʻoli ai ka naʻau o ko ke Kūlanakauhale o nā ʻĀnela, ʻoiai, ʻo ka manawa hope loa i lilo ai ka inoa moho iā lākou, he 10 makahiki aku nei. A no James, ʻo ka hā ia o ka inoa moho i lilo iā ia, a ma ke kūʻē ʻana aku i kona hui ma mua.
Eia mai kā kākou ʻōlelo noʻeau,
Hele ke poʻo a pōnaʻanaʻa.
ʻO ia hoʻi, ma muli o ka nui loa o nā mea e hana ai, ʻaʻole maopopo ka mea e hoʻomaka ai.
Ke Aolama 