10-16-20

Ua ʻeleu aʻela ka poʻe mana koho o Hawaiʻi nei.

ʻO ia aʻela kekahi poʻo nūhou o kēia lā, ka lā 16 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua māhuahua aʻela ka poʻe koho pāloka o kēia pae ʻāina nei. No ke koho wae moho ma ka mahina ʻo ʻAukake, he 795,248 mau mana koho i kākau inoa no ke koho pāloka ʻana. A ʻo ka nui o nā mana koho i koho pāloka ma ia koho wae moho, he 380,152. A ʻo ia mau helu, ʻo ia ka nui loa ma ka moʻolelo o Hawaiʻi nei. No ka lā koho pāloka, ʻo ia hoʻi, ka lā 3 o Nowemapa, he 832,000 mau mana koho a ʻoi aku i kākau inoa. A ke manaʻo ʻia nei, e piʻi aʻe ia helu ma muli o ka hiki ke kākau inoa a koho pāloka ma ka lā koho pāloka. Inā e hoʻouna ʻia ana ka pāloka ma ka leka, mai poina i ka pūlima ʻana ma ka hope o ka wahī leka a me ka waiho ʻana ma ka pahu leka ma ka lā 27 o ʻOkakopa a ma mua mai paha. A i ʻole ia, e waiho aku ma ka pahu pāloka a ma ke kikowaena koho pāloka paha ma mua o ka hola 7:00 o ke ahiahi o ka lā koho pāloka.

E hiki ana i ka lehulehu ke hele aku i nā kai kohola ʻehā o ka Hōkele Ko Olina. A ua hāmama nō hoʻi nā wahi kūkulu kaʻa. Ma mua, he manaʻo ko ia hōkele, e pāpā aku, ʻaʻole e hele aku ka lehulehu i nā kai kohola mua ʻekolu, ʻo ka poʻe wale nō e noho ana ma ka hōkele a me ka poʻe mea keʻena noho. A ʻo ke kai kohola ʻehā wale nō ke hāmama aku no ka lehulehu. A ʻo ka lā mua kēia e hāmama ai ia mau kai kohola a me nā wahi kūkulu kaʻa i kēia lā.

Eia mai kā kākou ʻōlelo noʻeau,

Ke koa ia e laumeki ai kahawai o Hilo.

He ʻōlelo kēia no ke koa keu a ka ikaika.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s