10-19-20

He mea hou e hoʻopiʻi ana i ka ʻoihana ʻaila.

ʻO ia aʻela kekahi poʻo nūhou o kēia lā, ka lā 19 o ʻOkakopa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.

ʻO ke Kalana ʻo Maui kekahi e hoʻopiʻi ana i ka ʻoihana ʻaila no ka loli ʻana o ke ʻano o ka manawa ma muli o ka puhi ʻana i ka wahie mōʻali pōhaku. I kēlā pule aku nei ka waiho ʻana i ka hoʻopiʻi i mua o ka ʻAha Kaʻapuni o Maui, e ʻōlelo ana, ua ʻike nā hui ʻaila he 20 i ko lākou hoʻopōʻino ʻana i ka honua no nā makahiki he nui akā, ua hoʻonalonalo ʻia. Ua waiho ʻē ʻo Honolulu me kekahi mau mokuʻāina he 21 a ʻoi i hoʻopiʻi i ʻane like.

E pāpā ana kekahi mau hale ʻaina ʻelua o Kauaʻi, ʻaʻole e pāʻina ka poe malihini mākaʻikaʻi ma loko o ia mau hale ʻaina. E ʻae ʻia ko lākou kauoha a kiʻi ʻana aku i ka mea ʻai a ʻo nā kānaka wale nō nona ka laikini hōʻoia mokuʻāina Hawaiʻi, ʻo lākou ke ʻae ʻia e noho ma loko o ka hale ʻaina a pāʻina. ʻO kahi pilikia paha, wahi a Mufi Hannemann, ka pelekikena o ka ʻAhahui Hoʻokipa Malihini Mākaʻikaʻi a Hoʻohale o Hawaiʻi, he hiki ke hōʻole ʻia ke kanaka inā ʻaʻole e kau ana ke pale ihu a ʻaʻole paha e hoʻokō ana i ka lula hoʻāloaloa. Wahi āna, he pono ke kaulike nā lula no ka malihini mākaʻikaʻi a me nā kānaka o neʻi nei.

A no ka manawa ma nā hoʻokūkū pōpō pekupeku o ke Kulanui o Hawaiʻi e mālama ʻia ana ma ke Kahua Pāʻani ʻo Aloha, ʻaʻole e ʻae ʻia ka poʻe mākaʻikaʻi. I kēia Pōʻaono, e mālama ʻia ana ka hoʻokūkū mua o nā Koa Ānuenue ma Fresno Mokuʻāina. A ʻaʻohe ana poʻe mākaʻikaʻi ma laila. ʻO Waiomina wale nō ka hoa paio e ʻae ana i ka poʻe mākaʻikaʻi ma ka hoʻokūkū. ʻO ka nui o nā kānaka e ʻae ʻia ana he 7,000. Ma ka lā 30 o ʻOkakopa ia hoʻokūkū.

Eia mai kā kākou ʻōlelo noʻeau,

Malu ke kula, ʻaʻohe keʻu pueo.

ʻO ia hoʻi, ua maluhia.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s