10-21-20

Ua hiki aku ka mea hoʻomaʻi kolona i Lānaʻi.

ʻO ia aʻela kekahi poʻo nūhou o kēia lā, ka lā 21 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

He ʻehā mau kānaka o Lānaʻi i loaʻa aku nei i ke COVID-19. ʻAkahi nō a loaʻa ua maʻi lā ma laila. ʻEkolu o lākou, he hana nō ma kahi like a he mau ʻōuli nō ko lākou. Ua hoʻokaʻawale ʻia aku nei lākou a ke hoʻomalu ʻia nei i ʻole e laha ua maʻi lā. I kēia Pōʻaono, hiki ke nānā ʻia ka loaʻa a me ka loaʻa ʻole paha i ua maʻi lā, e hele aku i ka Hale Kahiko ʻo Dole ma ke Kūlanakauhale ʻo Lānaʻi mai ka hola 9:00 o ke kakahiaka a i ka hola 1:00 o ka ʻauinalā. Ma luna o ke kaʻa nō e hana ʻia ai nā mea a pau. Akā, he pono ka hoʻopaʻa ʻana i manawa e hele ai. A ʻo ka poʻe wale nō he 15 makahiki a ʻoi.

ʻO Tua Tagovailoa ana ka ʻalihikūlele kūlana ʻekahi o Miami. Ua koho nā Naiʻa iā Tagovailoa ma ka puni o ka wae mea pāʻani o ke Kuʻikahi Pōpōpeku Aupuni. A ma ka Lāpule nei kāna hoʻokūkū mua i pāʻani ai ma ke ʻano he loea. He mau minuke wale nō kāna i pāʻani ai. ʻAʻohe hoʻokūkū o nā Naiʻa i kēia Lāpule. E kūʻē ana ʻo Miami iā Los Angeles ma ka lā mua o Nowemapa a ʻo ia ko Tagovailoa hoʻokūkū mua e hoʻomaka ai ʻo ia ka ʻalihikūlele.

A no Marcus Mariota, e hoʻi ana ʻo ia i ka papa inoa pāʻani o Las Vegas. I ka lā 7 o Kepakemapa, ua kau ʻo ia ma ka papa inoa o nā kānaka i ʻeha ma muli o ka umauma ʻanuʻu. Ma nā lula o ke Kuʻikahi Pōpōpeku Aupuni, he ʻekolu pule e paʻa ai ka mea pāʻani ma ka papa inoa o nā kānaka i ʻeha. A laila, he 21 mau lā hou e hoʻi ai ia mea pāʻani i ka papa inoa pāʻani.

Eia mai kā kākou ʻōlelo noʻeau,

Pili ke kua me ke alo.

He ʻōlelo kēia no ke kanaka hiwi loa.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s