ʻĀpono ʻia he lāʻau e lapaʻau ʻia ai ka poʻe i loaʻa i ke COVID-19
ʻO ia aʻela kekahi poʻo nūhou o kēia lā, ka lā 23 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.
Ua kāpae ʻia iho nei ka heihei malakona o Honoulu nei ma muli o ke COVID-19. ʻO ka lā 13 o ka mahina ʻo Kēkēmapa ka lā o ua heihei lā, akā, holo ihola ka manaʻo o Jim Barahal, ka pelekikena o ia heihei malakona. Ma ka hoʻomaka o ke kauwela, manaʻo ana ʻo Barahal, ua hiki paha ke mālama ʻia ka heihei, akā, ma muli o ka māhuahua koke ʻana o nā kānaka i loaʻa i ia maʻi, ʻaʻole i hiki.
A ma Lānaʻi, ua hōlapu aʻela ua maʻi ahulau lā. I ka Pōʻalua nei, ua kūkala ʻia he ʻehā mau kānaka i loaʻa i ka mea hoʻomaʻi kolona, a i kēia manawa, he 38 mau kānaka a ʻoi aku paha. A nolaila, ke paipai ʻia aku nei ko Lānaʻi, e noho ma ka hale, ʻaʻole e puka i waho, aia wale nō a he pono.
ʻAkahi nō a ʻāpono ʻia kekahi lāʻau e lapaʻau ʻia ai ka poʻe i loaʻa i ke COVID-19, i kapa ʻia ʻo remdesivir. Ma ke aʻa koko e hoʻokomo ʻia ai a e emi mai ka wā e polapola ai ke kanaka. He 15 lā ka mea maʻa mau, akā, ke lapaʻau ʻia me ua lāʻau lā, he 10 wale nō lā. Ua ʻāpono ʻia no ka poʻe i piha nā makahiki he 12 a he 88 mau paona a ʻoi aku. A ʻo ke koina nui, ʻo ka maʻi loa e noho ai ma ka haukapila ma muli o ia mea hoʻomaʻi.
Eia mai kā kākou ʻōlelo noʻeau,
E hoʻi ka waʻa; mai hoʻopaʻa aku i ka ʻino.
He wahi noi kēia, ʻaʻole e hana i ka hana e pōʻino ai ʻoe.
