Kū kilakila ana ʻo Los Angeles.
ʻO ia aʻela kekahi poʻo nūhou o kēia lā, ka lā 28 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
Ua māhuahua aʻela ka poʻe i loaʻa i ka mea hoʻomaʻi kolona ma Lānaʻi. I kēia manawa, he 87 lākou. A ua kauoha ʻia nā kānaka o Lānaʻi e noho paʻa ma ka hale a hiki i ka lā 11 o Nowemapa. A i kēia lā mai ka hola 8:30 o ke kakahiaka a i ka hola 3:00 o ka ʻauinalā, e hele aku paha ko Lānaʻi i ka Haukapila o Lānaʻi no ka nānā ʻana i ko lākou loaʻa a me ka loaʻa ʻole paha i ke COVID-19. A e mālama ʻia ana kekahi mai ka hola 7:00 o ke kakahiaka a i ka hola 1:00 o ke awakea o ka Pōʻaono. Aia ma hope o ka Hale Hoʻohana o Lānaʻi. Ma luna nō o ke kaʻa e noho ai i ka manawa e nānā ʻia ai. Inā he lā ʻino, e kāpae ʻia ana.
ʻO ko Iāpana kekahi e hiki mai ana i kēia pae ʻāina nei. ʻO ka lā 6 o Nowemapa ka lā e hoʻomaka ai ko lākou hiki ʻana mai. Ua holo ihola ka manaʻo o nā luna aupuni o Hawaiʻi me Iāpana ma kahi ʻaelike no ka nānā ʻia ʻana o nā kānaka no ka loaʻa me ka loaʻa ʻole o ke COVID-19 ma mua o ka hele ʻana mai i Hawaiʻi nei.
Lilo akula ka inoa moho pōpō hili o ke ao nei iā Los Angeles i ka pō nei. A ʻo ka mua ia mai ka makahiki 1988. ʻO ka pāʻani ʻeono ia ma ke kūʻē ʻana aku iā Tampa Bay. ʻO ka mea minamina ʻoiai e ulele ana ka hana, ua huki ʻia ʻo Justin Turner, ka pahu ʻekolu o Los Angeles. Ma hope mai ka wehewehe ʻana i kona kumu i huki ʻia ai, ua loaʻa ʻo ia i ka mea hoʻomaʻi kolona.
Eia mai kā kākou ʻōlelo noʻeau,
Kihe ka ihu i ka ʻale.
He ʻōlelo kēia no kahi kanaka e hele i kahi e pōʻino ai me ka hopohopo ʻole.
Ke Aolama 