10-30-20

He mea hoʻopilikia i ka laʻalāʻau kope, ua hiki mai i Hawaiʻi nei.

ʻO ia aʻela kekahi poʻo nūhou o kēia lā, ka lā 30 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua hiki mai ke kūkaehao lau kope i Hawaiʻi nei. Ma Haʻikū i Maui i loaʻa ai. Akā, inā hele a laha, he mea paha ia e pōʻino ai ka ʻoihana hoʻoulu kope ma Hawaiʻi nei. A ʻo ke kūkaehao lau kope, ua hele a puni ka honua a ke hoʻāʻo nei ka poʻe hoʻoulu kope e hoʻopau aku. ʻO ka mea paha e pono ai, ʻo ia ka hoʻoulu ʻana i ʻano kope hou i ʻoi aku ka ikaika ma ke pale ʻana aku i ke kūkaehao lau kope. ʻO ke ʻano o ia kūkaehao, he mea e hāʻule koke ai nā lau kope a e ʻōlala ai ka laʻalāʻau a e mālili ai ke kope. A ma ka ʻaoʻao o luna o ka lau, he mau kiko kūkaehao melemele a ʻalani. A ma ka ʻaoʻao o lalo o ka lau, ʻōʻili mai he mau mea hoʻolaupaʻi kūkaehao lau kope, a kohu pauka melemele a ʻalani.

Ua hou ʻia aku nei he ʻōpiopio i ka pahi he mau manawa i ka ʻauinalā o ka Pōʻahā nei ma ke Kula Haʻahaʻa ʻo Fern ma kahi o ka Pāpū ʻo Shafter. Ua lapaʻau ʻia ʻo ia a lawe ʻia akula i ka haukapila ma ke kūlana kūkonukonu.

I kēia ahiahi, e kūʻē ana ʻo Hawaiʻi iā Waiomina ma ke kinipōpō pekupeku ma Laramie. Ua kāʻili nā Koa Ānuenue i ka lanakila i kēlā pule aku nei, a e kāʻili hou nō paha i ka lanakila i kēia pule.

A pīhoihoi paha ka naʻau i ka hoʻomaka ʻana o Tua Tagovailoa no Miami. ʻO ka hoʻokūkū mua kēia, ʻo Tagovailoa ka ʻalihikūlele mua o nā Naiʻa. ʻO nā Hipa Kāne ka hoa paio.

Eia mai kā kākou ʻōlelo noʻeau

Aia ka puʻu nui i ke alo.

ʻO ia hoʻi, he pilikia ko kekahi.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s