Aloha nō ko ka ʻĀina Pilipino.
ʻO ia aʻela kekahi poʻo nūhou o kēia lā, ka lā 2 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.
Ua pāhola aʻela ʻo Kaipuni Goni ma ka ʻĀina Pilipino i ka hopena pule nei. He 20 mau kānaka a ʻoi aku paha i make. A ma kahi i pā mua i ke kaipuni, he 13,000 mau hale a haleʻāpulu paha i pōʻino ihola a lilo akula paha i ke kai. ʻO ka ikaika o ia kaipuni i kona wā i hiki ai i ka mokuʻāina ʻo Catanduanes, he 140 mile o ka hola me ka hiki aku o ka puahio i ka 174 mile o ka hola. Akā, ma hope o ka hiki ʻana ma ka ʻāina, ua emi loa ihola ka ikaika.
Ua kūkulu ʻia aku nei nā noho he 228 ma ka pā mauʻu ma mua pono o ka Hale Pule ʻo Central Union, he mau hōʻailona ia no nā kānaka he 228 i make ma muli o ka mea hoʻomaʻi COVID-19 ma Hawaiʻi nei. A hoʻokani ʻia nō hoʻi ka pele o ia hale pule he 228 manawa. He mau hana ia e hoʻomanaʻo ai i ia mau kānaka.
Ua lanakila aku nei nā Naiʻa o Miami ma luna o nā Hipa Kāne o ke Kūlanakauhale o nā ʻĀnela i ka Lāpule nei ma ka helu ʻai he 28 i ka 17. A ʻo ka hoʻokūkū mua nō ia a Tua Tagovailoa i hoʻomaka ai ma kona kūlana he ʻalihikūlele. Ua kau koke naʻe ka weli i ka wā a Tagovailoa i hoʻāʻo mua ai e nou aku i ka pōpō. Ua pā akula kona lima iā Aaron Donald o nā Hipa Kāne a pahemo ihola ka pōpō a lilo akula i nā Hipa Kāne, a loaʻa koke ihola ka ʻai holo. Akā, ma hope mai, hiu aʻela nā Naiʻa a paʻa ihola nā ʻai he 28.
Eia mai kā kākou ʻōlelo noʻeau,
ʻAʻohe mea ʻimi a ka maka.
ʻO ia hoʻi, ua loaʻa nā mea a pau i makemake ʻia.
Ke Aolama 