Hoʻomaka iho nei ka lele ʻana o Southwest mai Kāna Kieko i Hawaiʻi.
ʻO ia aʻela kekahi poʻo nūhou o kēia lā, ka lā 6 o Nowemapa, he Pōʻalima. Welina e nā makamaka. ʻO Ke Aolama kēia a penei ka nūhou.
Ua hoʻomaka iho nei ka lele pololei ʻana o nā mokulele o ka Hui Mokulele ʻo Southwest mai Kāna Kieko mai a i Hawaiʻi nei i kēlā me kēia lā. Ua manaʻo ihola ua hui mokulele lā, e hoʻomaka ka lele ʻana mai Kāna Kieko a i Kahului i ka lā 14 o ʻApelila, a i Honolulu i ka lā 20 o ʻApelila. Akā, ua hoʻopaneʻe ʻia ka hoʻomaka ʻana ma muli o ka laha ʻana o ka maʻi COVID-19.
Ke mākaukau ka lāʻau koʻokoʻo COVID-19, a ke lawa kūpono ka nui o ia lāʻau a me nā kānaka o neʻi nei e manaʻo ana e ʻō ʻia, he ʻeono mahina e ʻō ʻia ai he 60 pākeneka o ka lehulehu. ʻO ka poʻe mua e ʻō ʻia, ʻo ia ka poʻe e hana ana ma nā haukapila, nā hale ola a me nā wahi mālama ʻelemakule a pēlā pū me ka poʻe ʻelemākule.
Aia nō ke helu ʻia akula nā pāloka o Joe Biden a me Donald Trump. Akā, kohu mea lā, ʻo Biden ke kiʻi ana i ka lei o ka lanakila, ʻoiai, ua hele a ʻoi iki kona mau pāloka ma Keokia a me Penekelewinia. ʻAʻole naʻe i pau nā pāloka o ia mau wahi i ka helu ʻia.
Eia mai kā kākou ʻōlelo noʻeau,
E ala, e hoa i ka malo.
ʻO ia hoʻi, e ala a e ʻaʻako i ka hana.
Ke Aolama 