He pono ke hoʻololi ʻia ka inoa kapakapa a me ka mea hoʻolaki o ke Kula Kiʻekiʻe o Kahuku.
ʻO ia aʻela kekahi poʻo nūhou o kēia lā, ka lā 9 o Nowemapa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.
E kāpae ʻia ana ka inoa kapakapa a me ka mea hoʻolaki o ke Kula Kiʻekiʻe o Kahuku a e koho ʻia ana he inoa kapakapa hou a me ka mea hoʻolaki hou. He 70 a ʻoi nā makahiki i kapa ʻia ai ʻo Kahuku, ʻo Nā Red Raiders, akā, ma muli o ke ʻano hoʻokae i ka poʻe ʻōiwi o ʻAmelika, e hoʻololi ʻia ana. Ma hope o ke kāpae ʻia ʻana o ka inoa kapakapa o nā ʻIli ʻUlaʻula o Wakinekona o ke Kuʻikahi Pōpō Peku Aupuni, hana ʻia ihola he palapala hoʻopiʻi no ka hoʻololi ʻana i ka mea hoʻolaki o ua kula kiʻekiʻe lā, a he 1,135 mau kānaka i pūlima.
Ua kāʻili akula nā Koa Ānuenue i ka lanakila mai nā lima wīkani mai o Nū Mekiko i ka pō Pōʻaono nei ma ka helu ʻai he 39 i ke 33 ma ke Kahua Pāʻani ʻo Aloha. Ma ka hapahā ʻelua, e hāʻule ana ʻo Hawaiʻi ma ka helu ʻai he 20 i ka 7. Ma mua o ka wā hoʻomaha hapalua, he ʻai holo hou kā Hawaiʻi. A ma hope mai, i loko o nā minuke mua ʻekolu me nā kekona ʻelima, he ʻelua hou ʻai holo i nou ʻia e Chevan Cordeiro, a ʻo ka helu ʻai, he 28 i ka 20. E ʻoi hou ana nā Lobo ma ka helu ʻai he 30 i ka 28 akā, ma hope mai, hiu hou aʻela ʻo Hawaiʻi a ʻaʻole i hiki ke ʻoi hou ʻo Nū Mekiko.
Eia mai kā kākou ʻōlelo noʻeau,
ʻAʻohe kolopā nāna e une.
He ʻōlelo kēia no ke kanaka keu a ke poʻo paʻakikī.
Ke Aolama 