11-13-20

Ua pau kahi keʻena noho i ke ahi ma Oʻahu nei.

ʻO ia aʻela kekahi poʻo nūhou o kēia lā, ka lā 13 o Nowemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Hōʻike aʻela ka Meia Mike Victorino, e hāʻawi manawaleʻa ana ke Kalana ʻo Maui he 6,000 mau pelehū no ka Lā Hoʻomaikaʻi i nā kānaka o Maui i pilikia loa i ke COVID-19. E lilo ana ia mau pelehū i nā kānaka o ka polokalamu ʻo Hui Laulima Ulia Pōpilikia Hawaiʻi. Inā he nīnau paha kāu, e kāhea i ke keʻena o ka meia o Maui ma ka helu (808) 270-7855.

Ua pau i ke ahi kekahi keʻena noho ma ka hale papaʻi ʻo Naniwa Gardens ma ke alanui ʻo Hawaiʻi Kai i ke ahiahi Pōʻalua nei. ʻO ka nui o ka pohō o ia keʻena noho, he $360,000 a ʻo nā mea o loko, he $40,000. A ua like ʻole ka pohō ma muli o ka uahi, ka wela a me ka wai ma kekahi mau keʻena noho ma luna a ma lalo o ia keʻena i pau i ke ahi. ʻAʻohe kanaka ma ke keʻena noho i ka manawa e lalapa ana ke ahi, akā, he ʻelua ʻīlio o loko, a pōʻino ihola ko lāua ola. I ka hola 5:41 o ke ahiahi i ʻā ʻia ai ke ahi, a i ka hola 6:45, pau ihola i ke kinai ʻia. He hale papaʻi kahiko ia, a no laila, ʻaʻohe paipu kikī wai. ʻŌlelo maila ka waha ʻōlelo o ke Keʻena Kinai Ahi o Honolulu, ʻo Carl Otsuka, ua hele a ʻenaʻena loa ke ahi a no laila, ʻaʻole i hiki ke hoʻoholo i kahi o loko o ia keʻena noho i ʻā ʻia ai ke ahi.

I kēia Pōʻaono, e kūʻē ana ʻo Hawaiʻi iā Kāna Kieko Mokuʻāina ma ka pāʻani pōpō pekupeku, a ʻo ke kolu ia o ka hoʻokūkū ma ka ʻāina ʻē i loko o nā lā he 22.

Eia mai kā kākou ʻōlelo noʻeau,

He ukana ko ka houpo.

ʻO ia hoʻi, he pilikia e noʻonoʻo ʻia ana.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s