Ua hoʻomaka hou ka mākeke mahiʻai o ke Kulanui Kaiāulu ʻo Kapiʻolani.
ʻO ia aʻela kekahi poʻo nūhou o kēia lā, ka lā 16 o Nowemapa, he Pōʻakahi. Welina e nā makamaka heluhelu. ʻO Ke ʻAolama kēia a penei ka nūhou.
Ua hoʻi hou ka mākeke mahiʻai i ke Kulanui Kaiāulu ʻo Kapiʻolani i ka Pōʻaono nei. Ma muli o ka maʻi ahulau COVID-19, ua paʻa ua mākeke lā i ka pani ʻia i ka mahina ʻo Malaki. A ʻakahi nō a hemo hou. He 60 mau hui a ʻoi aku a emi mai e kūʻai ana ma ka Pōʻaono nei, a he mau haneli nā kānaka e holoholo ana ma laila e kūʻai ai i nā mea like ʻole. He 500 paha mau kānaka o kēlā me kēia hola. A e kau ana ke pale ihu a me ka hoʻokaʻawale ʻana he ʻeono kapuaʻi. A pāpā ʻia ka ʻai ʻana ma ka mākeke, akā, ua nui nā kānaka i pāʻina ma ka mauʻu ma kahi e kokoke ana.
Ua hāʻule iho nei ʻo Hawaiʻi iā Kāna Kieko Mokuʻāina i ka Pōʻaono nei ma ka helu ʻai he 34 i ka 10. Ua maikaʻi wale ka holo ʻana o nā Azateka. Ma ka hapahā mua, holo aku nei ʻo Jordan Byrd o Kāna Kieko Mokuʻāina he 51 ʻīā a loaʻa ka ʻai holo. A ma hope iki mai, holo aku nei ʻo Greg Bell he 62 ʻīā a loaʻa ka ʻai holo, a e ʻoi ana nā Azateka he 14 i ka hua kakā.
Eia mai kā kākou ʻōlelo noʻeau,
Pēpē i ka ua hoʻopoponi ʻili.
He ʻōlelo kēia no kahi kanaka i ʻeha kona naʻau.
Ke Aolama 