He mau nū maikaʻi no Max Holloway.
ʻO ia aʻela kekahi poʻo nūhou o kēia lā, ka lā 18 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
Ua kaiehu ʻia aku nei ʻo Christopher Krebs e ka Pelekikena Trump i ka Pōʻalua nei. ʻO Crebs, ʻo ia ke poʻo o ke Keʻena Hoʻomalu Kahua a Hoʻomalu ʻIke ma o ka Lolo Uila. Na Trump nō i hoʻokohu iā Crebs i ka makahiki 2016. ʻO ka mea i pilikia ai ʻo Crebs, ʻo ia kona hōʻoia ʻana i ke kūpono o ke koho pāloka ʻana o kēia makahiki nei 2020, ʻoiai, he kūʻē ia i ka ʻōlelo a ka pelekikena.
Ua paʻa ihola ka hoa paio hou o Max Holloway. ʻO Calvin Kattar nō ia, a e hui pū ana lāua ma ka pahu mokomoko ma ka lā 16 o Ianuali. ʻO ia ana ka pō mokomoko mua o ka UFC ma ka makahiki 2021. A no ia hakakā ʻana o Holloway lāua ʻo Kattar, ʻaʻohe inoa moho e lilo ana i ka lanakila. Ma nā manawa hope ʻehā a Holloway i mokomoko ai, ua hāʻule ihola ʻo ia he ʻekolu manawa. Akā, ma loko o kēlā, ʻo Holloway nō ka moho ʻimi inoa moho helu ʻekahi ma ka māhele 145 paona. ʻO Kattar ka helu ʻeono. A ma nā mokomoko hope ʻelima o Kattar, lilo aku nei ke eo iā ia he ʻehā manawa.
A ʻo kekahi pōmaikaʻi o Holloway, ua hoʻopalau aku nei ʻo ia iā Alessa Quizon. He heʻenalu ʻo Quizon ma ke ʻano he loea.
Eia mai kā kākou ʻōlelo noʻeau,
Nā keiki a Kalaihaohia.
He ʻōlelo kēia no ka poʻe ʻānunu.
Ke Aolama 
Nā keiki a Kalaihaohia. Mai hea mai kēlā ʻōlelo noʻeau? Ua kamaʻilio aku nei mākou ma ka papa Makahiki ʻEkolu a Kumu Kaleikoa Kaʻeo e pili ana i kēia ʻōlelo noʻeau, ʻaʻole i loaʻa mai ka manaʻo o Kalaihaohia. He wahi paha? Mahalo a nui e Kumu.
LikeLike
aloha mai e Piʻihonua,
Mahalo i ka nīnau ʻana mai. No loko mai ia ʻōlelo noʻeau o ka puke “ʻŌlelo Noʻeau” na Mary Kawena Pukui. He wahi nō paha. Akā, inā he wahi, manaʻo ihola au, he “o” paha, ʻo ia hoʻi, nā keiki o Kalaihaohia. A he “a” ko laila, no laila, manaʻo ihola au he kanaka ʻo Kalaihaohia. A ke manaʻo nei au, i kekahi manawa, haku wale ʻia ka inoa kanaka no ka hoʻopilipili ʻana i ka manaʻo. E like me ka ʻōlelo, “Aia paha iā Limaʻāpā.” Manaʻo ihola au, ʻaʻole paha he kanaka maoli ʻo Limaʻāpā e ola ana ma mua, akā, ua haku ʻia no ka hoʻopilipili ʻōlelo ʻana, “lima” “ʻāpā”. A ʻo ia paha ke ʻano o ia inoa ʻo Kalaihaohia. ʻO nā ʻōlelo i hoʻopilipili ʻia ʻo ia hoʻi, ʻo kālai a me haohia (hao), no ka lawe ʻana i nā mea he nui a i nā mea a pau nō paha. ʻO ka mea minamina, ʻaʻole wehewehe ʻia ma ka puke a Tūtū Pukui inā he ʻāina, a he kanaka paha ʻo Kalaihaohia. ʻO ka “a” wale nō kaʻu mea i kuhi ai, he kanaka ia. Lana ka manaʻo, he kōkua ia. Hāʻawi i koʻu aloha iā Kumu Kaleikoa.
ke aloha
kekeha
LikeLike