He lāʻau koʻokoʻo COVID-19 hou i ʻaneʻane e mākaukau.
ʻO ia aʻela kekahi poʻo nūhou o kēia lā, ka lā 23 o Nowemapa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.
ʻAneʻane e mākaukau ke kolu o ka lāʻau koʻokoʻo COVID-19. Na ka Kulanui ʻo Oxford i hoʻomōhala a na ka hui ʻo AstraZeneca i hana mīkini. ʻAʻole i pau ka wehewehe ʻano ʻana i ka hoʻāʻo ʻana. Akā, ʻo ka poʻe i ʻō ʻia i ka lāʻau koʻokoʻo, ʻaʻole i hele a maʻi loa a ʻaʻole i pono ka noho ʻana ma ka haukapila. ʻO kekahi ʻano maikaʻi o ia lāʻau koʻokoʻo, ʻaʻole pono ka mālama ʻia ʻana ma ka huʻihuʻi loa ma ka halihali ʻana e like me ka lāʻau koʻokoʻo a ka hui ʻo Pfizer. ʻO kā Pfizer lāʻau koʻokoʻo, he pono ke mālama ʻia ma ke kēkelē Palanaheika 94 ma lalo o ka ʻole. A ʻo kā AstraZeneca, mai ke kēkelē Palanaheika 36 a i ke 46. A ma waena o nā lāʻau koʻokoʻo ʻekolu, ʻo kā Oxford-AstraZenecxa ka mea i emi loa, ʻoiai, ua hoʻohiki ʻo AstraZeneca, ʻaʻole ʻo ia e ʻimi i ke kālā puka mai ia lāʻau koʻokoʻo mai i ka wā e hōlapu ana ka maʻi ahulau a puni ka honua. A no laila, ʻo ke kumu kūʻai o ka māhele lāʻau hoʻokahi, he $2.50. ʻO ka māhele lāʻau hoʻokahi o kā Pfizer lāʻau koʻokoʻo, he $20. A ʻo kā Moderna, kekahi hui nāna i hana i lāʻau koʻokoʻo COVID-19, mai ka $15 a i ka $25. A hōʻike aʻela nā mea noiʻi o Oxford a me ka hui ʻo AstraZeneca, ʻaʻole lākou e hoʻokūkū nei me nā hui ʻē aʻe, a he mau lāʻau koʻokoʻo ka mea e pono ai ka hiki ʻana aku o ka lāʻau koʻokoʻo i nā kānaka a pau o ka honua nei a i mea hoʻi e pau ai ia maʻi ahulau.
Ua hāʻule hou ihola nā Koa Ānuenue ma ka hoʻokūkū pōpō peku o ka Pōʻaono nei i hala. Ma ka hoʻomaka ʻana o ka hapahā ʻekolu, e ʻoi ana ʻo Boise ma ka helu ʻai he 33 i ka 9. Akā, hiu aʻela ʻo Hawaiʻi a loaʻa he ʻekolu ʻai holo, ʻaʻole naʻe i lawa a ʻo ka helu ʻai hope loa, he 40 ʻai a Boise i ke 32 a Hawaiʻi.
Eia mai kā kākou ʻōlelo noʻeau,
I ka moana nō ka iʻa, liuliu ʻia nā pono lawaiʻa.
ʻO ia hoʻi, e hoʻomākaukau a mākaukau.
Ke Aolama 