E mālama ʻia paha ka hoʻokūkū hula kaulana o ke ao nei.
ʻO ia aʻela kekahi poʻo nūhou o kēia lā, ka lā 30 o Nowemapa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.
E mālama ʻia paha ka hoʻokūkū hula ʻo ka Merrie Monarch i ka makahiki 2021. Akā, ʻaʻole e ʻae ʻia ke anaina mākaʻikaʻi e hele kino. Wahi a Luana Kawelu, ka Pelekikena o ka Hoʻokūkū ʻo ka Merrie Monarch, ʻo ke ola maikaʻi a me ka palekana o ka lehulehu ka mea nui hoʻokahi a no laila, ua holo ka manaʻo, inā e mālama ʻia ka hoʻokūkū, ʻaʻohe ana anaina mākaʻikaʻi o laila. A hōʻike aʻela ʻo Kathy Kawelu, ke kaikamahine a Luana, ʻaʻole e ʻae ʻia ke noi likiki no ka makahiki 2021. Mai hoʻoili i ke noi likiki me ka uku e like me ka mea maʻa mau ma mua.
Ua hala akula ʻo Dave Prowse i kēlā ʻaoʻao. ʻO Prowse, ʻo ia nō ʻo Lō Veda ma nā kiʻi ʻoniʻoni mua ʻekolu ʻo Star Wars. No Prowse ke kino akā, ʻaʻole nona ka leo o Lō Veda. He inoa moho amo hao ʻo Prowse ma ʻEnelani a ma hope mai, lilo ihola ʻo ia i mea hana keaka.
ʻAkahi nō a hāʻule ʻo Newada ma ka hoʻokūkū pōpō peku. A ʻo nā Koa Ānuenue ka mea nāna i hoʻopahuʻa ka Pūʻā ʻĪlio Hae o Newada ma ka helu ʻai he 24 i ka 21. Ua maikaʻi ka hana a nā Koa Ānuenue. ʻAʻole i lilo aku ka pōpō mai ko lākou lima aku, a hoʻokahi wale nō ʻaʻe nui i hana ʻia e Hawaiʻi. Ua ʻoi aku nō hoʻi ka maikaʻi o kā lākou hana ma ka hina ʻekolu. I ka Pōʻaono nei, ua hoʻokō ʻia he 64.3 pākeneka o ka manawa.
Eia mai kā kākou ʻōlelo noʻeau,
He lohe ke ola, he kuli ka make.
ʻO ia hoʻi, he mea nui ka maliu ʻana i ka ʻōlelo aʻo maikaʻi.
Ke Aolama 