12-02-20

E hele mai ana ka hui pōpō peku o ke Kulanui o San Jose State.

ʻO ia aʻela kekahi poʻo nūhou o kēia lā, ka lā 2 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻŌlelo ihola ka Loio Kuhina William Barr, ʻaʻole i huʻe aku ke Keʻena Kānāwai i hōʻike no ka hana ʻāpuka laulaha ma ke koho pāloka ʻana aku nei e loli ai ka hopena i ʻike ʻia. Wahi a Barr, e hana ana nā loio o ʻAmelika Hui Pū ʻIa a me nā ʻākena o ke Keʻena Noiʻi Pekelala ma ka hoʻokolo i nā kumu hoʻopiʻi a me ka ʻike i loaʻa iā lākou, akā, ʻaʻohe wahi mea i loaʻa e loli ai ka hopena.

ʻAkahi nō a holo ka manaʻo, ma Oʻahu ana e mālama ʻia ai ka hoʻokūkū pōpō peku kahi e kūʻē ana ʻo Hawaiʻi iā San Jose State. ʻO kahi i paʻa ʻē no ia hoʻokūkū, aia ma Kaleponi ʻĀkau, akā, ma muli o ka hōlapu loa ʻana o ka maʻi ahulau COVID-19 ma Kaleponi, pāpā ʻia nā pāʻani leʻaleʻa no nā pule ʻekolu e hiki mai ana. Ma hope o ke kūkākūkā ʻana, ua holo ka manaʻo, ma ke Kahua Pāʻani ʻo Aloha e mālama ʻia ai.

A ma ka ʻaoʻao ʻākau o Oʻahu nei, hoʻopakele ʻia aku nei he 19 mau kānaka ma muli o ka nui o nā nalu. Ua hana nā kiaʻi ola a hala ka hola 5:30 o ka ʻauinalā i mea e palekana pono ai nā mea a pau. No nā kahakai a pau o ka ʻaoʻao ʻākau a me komohana o nā mokupuni mai Niʻihau a i Molokaʻi, a me ka ʻaoʻao ʻākau o Maui, he kūkala nalu pū kī ke kū nei a hiki i ka hola 6:00 o ke ahiahi o ka Pōʻahā. E hiki aku paha nā nalu i ke 45 kapuaʻi ma Niʻihau me Kauaʻi, a he 40 kapuaʻi ma Oʻahu, Molokaʻi a me Maui.

Eia mai kā kākou ʻōlelo noʻeau,

ʻOhuʻohu Halemano i ka lau lehua.

He ʻōlelo kēia no ke kanaka uʻi.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s