12-07-20

E helu ʻia paha kekahi mau ululāʻau o Hawaiʻi nei ma ka Papa Ululāʻau Aupuni.

ʻO ia aʻela kekahi poʻo nūhou o kēia lā, ka lā 7 o Kēkemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Na ka Lunamakaʻāinana Ed Case i hāpai i pila e helu ʻia ai nā ulu lāʻau o Hawaiʻi nei ma ka Papa Ululāʻau Aupuni o ʻAmelika Hui Pū ʻIa. A i ka Pōʻahā nei, ua ʻāpono ʻia e ka Hale o nā Lunamakaʻāinana a aia i mua o ka ʻAha Kenekoa i kēia manawa. He 154 mau ululāʻau aupuni o ka Papa Ululāʻau Aupuni, a he 20 kula ākea (ʻāina mauʻu) aupuni. ʻO ka mea ʻāpiki, he mau ululāʻau kū kahi a ʻane make loa ko Hawaiʻi nei akā, ʻaʻohe ona Ululā’au Aupuni. Wahi a Case, ke helu ʻia kekahi ululāʻau o Hawaiʻi nei ma ia Papa Ululāʻau, e kākoʻo ʻia auaneʻi ka noiʻi a me ka hoʻomalu ʻia o nā ululāʻau kopikala o kēia pae ʻāina a me ka loaʻa o nā manawa kūpono no nā hana hoʻonanea, nā hana pili i ka ʻoihana kālepa a me nā hana me nā ʻike a ka poʻe o Hawaiʻi nei.

Ua hoʻolālā aku nei ka Meia Kirk Caldwell i ka hana e hoʻomākaʻikaʻi ʻia ai ke Alapiʻi o Haʻikū. A aia nō i mua o ke Kōmike Hoʻoulu Waiwai o ka ʻAha Kūkā o Honolulu a e koho pāloka ana ia kōmike i ka hola 1:00 o ke awakea o kēia lā. He makemake kekahi poʻe e hemo hou ua alapiʻi lā. Aka, ʻo kekahi poʻe, he kūʻē aku nō, wahi a lākou, mai ka manawa mai i pāpā ʻia ai, ʻaʻole e piʻi aku i laila, he mau kānaka i komo hewa me ka hoʻāʻo ʻana e hiki aku i ke alapiʻi a luku lākou i ka ʻāina o nā kānaka e noho ana i laila.

 Eia mai kā kākou ʻōlelo noʻeau

Hoʻokuʻi a kole ka lae.

He ʻōlelo kēia no ke kanaka i kū a pilikia.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s