Hoʻomaka ke kikina pōpō hīnaʻi o nā Kāne me nā Wāhine Ānuenue i kēia hopena pule.
ʻO ia aʻela kekahi poʻonūhou o kēia lā, ka lā 9 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.
I ka Pōʻalua nei, ʻaʻole i mālama ʻia ka Hoʻokūkū Heʻenalu Loea o nā Wāhine o ka ʻAhahui Heʻenalu Honua ma Honolua. I mālama ʻole ʻia ma muli o ka nahu ʻia ʻana o kekahi heʻenalu ma mua o ka hoʻomaka ʻana o ka hoʻokūkū. He kanaka ia no Lahaina, a ʻaʻole ʻo ia ma ka hoʻokūkū. Ua lawe ʻia akula ʻo ia i ka haukapila. ʻAʻole i maopopo ka lā e hoʻomaka hou ai ka hoʻokūkū. I ka Pōʻakahi nei, ua holo mua ʻo Clarissa Moore i ka puni wae moho ma ka lanakila ʻana ma luna o Malia Manuel. A ʻo Tyler Wright kekahi i holo mua i ka puni wae moho. A he wahine ʻo Wright i hoʻoulu i nā kānaka ma ke komo ʻana aku i ka pālule e kau ana ka hae Haʻaheo Holomua. He hae ia e hoʻohanohano ana i nā kānaka o nā ʻili like ʻole a me ka poʻe māhū. ʻO ka makamua ia o ke komo ʻana o kekahi i ia ʻano pālule ma ia hoʻokūkū.
I kēia hopena pule e mālama ʻia ai ka hoʻokūkū pōpō hīnaʻi mua o nā hui pōpō hīnaʻi o ke Kulanui o Hawaiʻi. I kēia Pōʻalima, e kūʻē ana ʻo nā Koa Ānuenue iā Hawaiʻi Pākīpika ma ke Kikowaena ʻo Stan Sheriff. E hoʻomaka ana i ka hola 7:05 o ke ahiahi. A e kūʻē ana nō hoʻi nā Wāhine Ānuenue iā Hawaiʻi Pākīpika i ka Lāpule. Ma ka Stan Sheriff nō hoʻi ia, a e hoʻomaka ana i ka hola 5:05 o ka ʻauinalā. ʻAʻole e ʻae ʻia ke anaina mākaʻikaʻi ma muli o ka maʻi ahulau, akā, e hoʻolele ʻia ana nō ia mau hoʻokūkū ʻelua ma ka Spectrum Sports.
ʻO kahi mea minamina, ua holo ka manaʻo o Samuta Avea o nā Koa Ānuenue, ʻaʻole ʻo ia e pāʻani pōpō hīnaʻi ana i kēia kikina. I kēlā kikina aku nei, ʻo ka ʻawelika, he 10.8 āna ʻai.
Eia mai kā kākou ʻōlelo noʻeau,
Hāʻule i ka hope waʻa.
He ʻōlelo kēia no ke kanaka i hiki lohi mai a i hiki hope loa mai paha.
Ke Aolama 