Ua kāʻili ʻia ka inoa moho mokomoko mai nā lima wīkani o ʻIlima-Lei Macfarlane.
ʻO ia aʻela kekahi poʻo nūhou o kēia lā, ka lā 11 o Kēkēmapa, he Pōʻalima. Welina e nā makamaka. ʻO Ke Aolama kēia a penei ka nūhou.
ʻO Kalaupapa kahi hope loa i hiki ʻole ai ka mea hoʻomaʻi kolona ma ʻAmelika Hui Pū ʻIa, akā, ʻakahi nō a hiki aku ke COVID-19 i Kalaupapa i Molokaʻi. ʻO ke kanaka i loaʻa i ua mea hoʻomaʻi lā, ua hoʻomaopopo ʻia kona loaʻa i ia maʻi ma hope o kona hoʻi ʻana aku i Kalaupapa ma ka mokulele. I kēia manawa, aia nō ma kahi kaʻawale a ʻaʻohe ona ʻōuli.
ʻO Carmen Hulu Lindsey ka luna hoʻomalu hou o ka Papa Kahu Waiwai o ke Keʻena Kuleana Hawaiʻi. He kahu waiwai ʻo Lindsey no Maui no nā makahiki ʻewalu i hala iho nei. ʻO Colette Machado ka luna hoʻomalu ma mua, ʻaʻole naʻe ʻo ia i koho pāloka hou ʻia i kahu waiwai. ʻO Lei Ahu Isa ka hope luna hoʻomalu. ʻO Kalei Akaka ka luna hoʻomalu o ke Kōmike Hoʻomana a Kākoʻo i nā Mea Hoʻokahu ʻia. A ʻo John Waiheʻe IV ka luna o ke Kōmike Hoʻoponopono Kumuwaiwai.
ʻO ke kanaka i nahu ʻia e ka manō i ka Pōʻalua nei ma Honolua i Maui i ka Pōʻalua nei, ua make aku nei i ka Pōʻakolu nei. ʻO Robin Warren kona inoa. No Nāpili ʻo ia. ʻO ka manawa hope loa i make ai kekahi i ka manō ma Hawaiʻi nei, ʻo ia ka mahina ʻo Mei o ka makahiki 2019. Ua nahu ʻia ua kanaka lā i kona wā e ʻauʻau ana ma Honokōwai i Maui.
Aloha nō. ʻAkahi nō a hāʻule ʻo ʻIlima-Lei Macfarlane ma ka mokomoko ʻana. Ua eo ihola ʻo ia nei iā Juliana Velasquez a lilo ihola ka inoa moho iā Velazquez. ʻO Macfarlane ka inoa moho o ka māhele 125 paona no nā makahiki ʻekolu i hala iho nei. He ʻelima puni a ua lōkahi ka manaʻo o nā luna nānā, ua ʻoi aku ʻo Velazquez, he 48 i ke 47, he 49 i ke 46, a he 48 i ke 47.
Eia mai kā kākou ʻōlelo noʻeau.
Ka iʻa leo nui o ka pali.
ʻO ke kao ia.
Ke Aolama 