E pāʻani ana ʻo Hawaiʻi ma ka Ipu Nū Mekiko.
ʻO ia aʻela kekaih poʻo nūhou o kēia lā, ka lā 14 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.
Ua hoʻomaka ihola ke ʻō ʻia ʻana o nā limahana ʻoihana olakino i ka lāʻau koʻokoʻo COVID-19 ma ʻAmelika Hui Pū ʻIa. ʻO lākou a me nā ʻelemākule e noho ana ma nā hale mālama ke ʻō mua ʻia i ka lā’au koʻokoʻo. I kēia manawa, ʻo ka nui o nā māhele lāʻau o ia lāʻau koʻokoʻo o ʻAmeilka Hui Pū ʻIa, he 3 miliona a emi mai. ʻO ka mea e pono ai ke kanaka, he ʻelua māhele lāʻau. Na Pfizer ia lāʻau koʻokoʻo, a ua ʻāpono ʻia nō, ʻaʻole naʻe i pau loa ka noiʻi ʻana. Aia nō ma ka māhele hope loa. ʻO kekahi nīnau i koe, ʻo ka hoʻolele ʻia a me ka ʻole paha o ke COVID-19 e ke kanaka i loaʻa i ua mea hoʻomaʻi lā me ka ʻike ʻole ʻia o nā ʻōuli.
I ka Pōʻaono nei ma ka hoʻokūkū pōpō pekupeku, ua hiu aʻela ʻo Hawaiʻi a lanakila aku nei ma luna o ke Kulanui o Newada-Las Vegas ma ka helu ʻai he 38 i ka 21. A ma muli paha o ia lanakila ʻana, kono ʻia ihola nā Koa Ānuenue i ka Ipu Nū Mekiko. E mālama ʻia ana ma Tekeka ma muli o ka pilikia o Nū Mekiko i ka maʻi ahulau. ʻO ke Kulanui o Houston ka hoa paio o Hawaiʻi. Aia ka Ipu Nū Mekiko ma ka lā 24 o ka mahina ʻo Kēkēmapa.
Eia mai kā kākou ʻōlelo noʻeau,
Kū ke paʻi, hana ka hāʻawe.
ʻO ia hoʻi, he nui ka hana.
Ke Aolama 