E kūkulu ʻia paha ka hale pili waiwai ma Oʻahu nei.
ʻO ia aʻela kekahi poʻo nūhou o kēia lā, ka lā 16 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.
He manaʻo ko ke Keʻena ʻĀina Hoʻopulapula Hawaiʻi e kūkulu i hale pili waiwai ma ka ʻāina hoʻopulapula i Kapolei. ʻO ka mea ʻāpiki, ʻaʻole i kūkākūkā ʻia nā mea hoʻokahu ʻia. ʻAkahi nō a ʻike ʻia e ka lehulehu i ka wā i kau ai ka papa hana o ia keʻena no kona mau hālāwai e hiki mai ana i ka Pōʻakahi a me ka Pōʻalua o kēia pule aʻe. I kēia lā paha ma ke kahua pūnaewele o ia keʻena e hōʻike ʻia ai ke au nui a me ke au iki o ka pila e hāpai ʻia ana.
Loaʻa aku nei he ʻīlio hohono ola ma ka uapo o Kahului i ke kakahiaka o ka Pōʻalua nei. ʻO ka mea maikaʻi, ua paʻa aku nei i ka hopu ʻia. A ʻo ia ʻīlio hohono hoʻokahi ka mea i loaʻa. A aia nō ka ʻOihana Mahiʻai ke noiʻi akula i ke ala i hiki mai ai ua ʻīlio hohono lā i Maui. I ka makahiki 2018, ua loaʻa ʻelua ʻīlio hohono ola ma Hawaiʻi nei. ʻO kekahi ma Honolulu a ʻo kekahi ma Maui. Pāpā ʻia ka ʻīlio hohono ma Hawaiʻi nei. ʻO ka mea wale nō e ʻae ʻia ai ka ʻīlio hohono, ʻo ka hana noiʻi a ma ke kahua hōʻikeʻike holoholona laka ʻole.
Eia mai kā kākou ʻōlelo noʻeau,
Noʻeau ka hana a ka ua; akamai ka ʻimina o ka noʻonoʻo.
He ʻōlelo mahalo kēia i ke kanaka akamai.
Ke Aolama 