E ʻolohani ana paha nā kahu maʻi o ka Haukapila ʻo Kapiʻolani.
ʻO ia aʻela kekahi poʻo nūhou o kēia lā, ka lā 11 o ka mahina ʻo Ianuali, he Pōʻakahi. Welina e nā makamaka. ʻO Ke Aolama kēia a penei ka nūhou.
He hiki nō i nā kahu maʻi o ka Haukapila ʻo Kapiʻolani no nā Wāhine a me nā Keiki ke ʻolohani. He ʻeono mahina e kūkākūkā ana ka uniona me ka Haukapila a ma muli o ka palapala ʻaelike hope loa i hāpai ʻia iho nei, ua holo ihola ka manaʻo e koho pāloka nā kahu maʻi i ka pono a me ka ʻole o ka ʻolohani ʻana. A he 93 pākeneka o nā kahu maʻi i ʻāpono aku nei i ka ʻolohani. ʻO kekahi pilikia, i kēia manawa, ma ka manawa hana hoʻokahi o ke kahu maʻi, he pono ke hana like me nā maʻi i loaʻa i ke COVID-19 a me nā maʻi i loaʻa ʻole i ke COVID-19. ʻO kekahi pilikia, he koina ke komo hou ʻana i ke pale ihu N95 i komo ʻē ʻia, he lula ia no Hawaiʻi Pacific Health, ka makua o ka Haukapila ʻo Kapiʻolani, a ʻo ia wale nō ka hui haukapila e hoʻohana hou ana i ke pale ihu ma hope o ka hoʻomaʻemaʻe ʻana. ʻO nā haukapila ʻē aʻe, he kiloi aku ma hope o ka hoʻohana ʻana he hoʻokahi wale nō manawa.
Ua hōʻike aʻela ʻo Nancy Pelosi, ka luna hoʻomalu o ka Hale o nā Lunamakaʻāinana, e holo mua ana ka hoʻopiʻi e hoʻopau aku i ka Pelekikena Donald Trump mai ka ʻoihana aku. Wahi a Pelosi, he mea ʻo Trump e pau ai ka pono o ke aupuni a ka lehulehu ma muli o nā mea i ʻike ʻia ma ke Kapikala i kēlā Pōʻakolu aku nei. ʻAʻole i maopopo ka nui o nā Repubalika e kākoʻo ana i ia hoʻopiʻi akā, he ʻelua kenekoa Repubalika e makemake ana e haʻalele koke ʻo Trump i ke kūlana Pelekikena. ʻO ia ʻo Kenekoa Pat Toomey o Penesilevania a me Kenekoa Lisa Murkowski o ʻĀlaka.
Eia mai kā kākou ʻōlelo noʻeau,
Haʻihaʻi nā iwi o ke kolohe.
ʻO ia hoʻi, ua loaʻa pono akula ke kolohe a hoʻopaʻi ʻia.
Ke Aolama 