E mokomoko hou ana ʻo Max Holloway i kēia Pōʻaono.
ʻO ia aʻela kekahi poʻo nūhou o kēia lā, ka lā 13 o Ianuali, he Pōʻakolu. Welina e nā makamaka heluhelu. ʻO Ke Aolama kēia a penei ka nūhou.
Ua hoʻomake ʻia iho nei kekahi wahine o Kanekaka i ke aumoe o ka Pōʻalua nei no kona ʻumi ʻana i ka wahine hāpai ma Mikouli i ka makahiki 2004. Ua ʻō ʻia ʻo Lisa Montgomery i ka lāʻau make, a ʻo ia ka paʻahao wahine mua i hoʻomake ʻia e ke aupuni ʻAmelika Hui Pū ʻIa mai ka makahiki 1953. A ʻo ka ʻumi kumamākahi ia o ka paʻahao i ʻō ʻia i ka lāʻau make ma ke Kikowaena Paʻahao o ʻInikiana mai ka mahina ʻo Iulai, ka wā hoʻi i hoʻomaka hou ai ka Pelekikena Donald Trump i ka hoʻomake pekelala ʻana. He ʻelua paʻahao pekelala hou e hoʻomake ʻia ana ma mua o ka hoʻoponi ʻia ʻana o ka Pelekikena i koho ʻia iho nei, ʻo Joe Biden. He manaʻo ko Biden e hoʻopau ʻia ka hoʻomake pekelala ʻana.
Ua hiki maila he 109,250 mau māhele o ka lāʻau koʻokoʻo COVID-19 i Hawaiʻi nei, akā, a hiki i ka Pōʻakahi nei, he 39,000 wale nō mau kānaka a ʻoi iki i ʻō ʻia. Wahi a ke Keʻena Ola, ua lohi ka hōʻike ʻana i ka nui o nā kānaka i ʻō ʻia, a no laila, ua ʻoi loa aku ka helu. Ke manaʻo nei nā luna o ke Keʻena Ola, e ʻō ʻia he 100,000 mau kānaka i kēia mahina nei, a he 150,000 i kēlā me kēia mahina a ka mahina ʻo Mei.
Pīhoihoi ka naʻau o Max Holloway i kona mokomoko ʻana me Calvin Kattar i kēia Pōʻaono. No ka mea, e mālama ʻia ana ma Dubai a e hoʻolele ʻia ana ma ke kīwī ma ABC, a ʻo ka makamua ia mai ka makahiki 2000. Ke lana nei ka manaʻo o lāua ʻelua, e hiki ana ke kūʻē aku iā Alexander Volkanovski no ka inoa moho. ʻO Holloway ka moho kūʻē helu ʻekahi o ka UFC. A ʻo Kattar ka helu ʻeono.
Eia mai kā kākou ʻōlelo noʻeau,
Hāʻule i ka hope waʻa.
He ʻōlelo kēia no ke kanaka hiki lohi mai a hiki hope loa mai paha.
Ke Aolama 