Ua hala akula kekahi mea pāʻani pōpō pekupeku kaulana o ke Kulanui o Hawaiʻi i ke ala hoʻi ʻole mai.
ʻO ia aʻela kekahi poʻo nūhou o kēia lā, ka lā 12 o Mei, he Pōʻakolu. Welina e nā makamaka. ʻO Ke Aolama kēia a penei ka nūhou.
Ua moe akula ʻo Colt Brennan i ka moe kapu o Niolopua i ka Pōʻakahi nei. Ua piha nā makahiki he 37 wale nō iā ia. He ʻalihikūlele ʻo Brennan no ka hui pōpō pekupeku o ke Kulanui o Hawaiʻi ma mua, i hele a kaulana i kāna mau hana ma ke kahua pāʻani. ʻO kekahi mea i kaulana ai ʻo Brennan, ʻo ia kona hōʻole ʻana e komo koke i ke Koho Mea Pāʻani o ke Kuʻikahi Pōpō Peku Aupuni i ka makahiki 2007. A ua ʻōlelo ʻia, e koho ʻia ʻo Brennan i ka puni ʻelua. Ua hoʻi akula naʻe ʻo ia i ke Kulanui o Hawaiʻi no ka pāʻani pōpō peku i kona kikina hope loa. A ma ia kau hope loa, ʻaʻole i hāʻule iki nā Ānuenue ma ke kikina kūmau, he 12 lanakila, ʻaʻohe hāʻule. A lanakila akula nō hoʻi ma luna o Wakinekona. A pāʻani akula ma loko o ka Ipu Kōpaʻa ma ke kūʻē ʻana aku iā Keokia. Ua nui ke aloha o Brennan iā Hawaiʻi a me kona mau kānaka. A pēlā nō ko Hawaiʻi iā ia.
Ua loaʻa akula i ka mākaʻi kekahi mau kānaka ʻelua i manaʻo ʻia na lāua i pōā aku i kekahi mau kūpuna. A ʻo ka hapanui o ia mau pōā ʻana, aia ma loko o ka hale o kekahi mau kūpuna. ʻO Collin K. Taʻa lāua ʻo Keith K. Catolico nā inoa o lāua. Pōā aku nei lāua i kekahi kanaka ʻoiai ʻo ia ma kona kaʻa ma ʻAiea i ka mahina ʻo Pepeluali, a pōā akula i kekahi ma Kailua i ka mahina ʻo Kepakemapa. A ʻo Taʻa, hoʻohuoi ʻia ihola, nāna kekahi mau pōā ʻekolu ma Waipahu, ma Waiʻalae a me Nuʻuanu. A hoʻohuoi ʻia ʻo Catolico, nāna kekahi pōā ʻana ma Maunalua. ʻO nā kānaka a pau i pōā ʻia, he 60 makahiki a ʻoi.
Eia mai kā kākou ʻōlelo noʻeau,
ʻAʻohe hana nui ke alu ʻia.
ʻO ia hoʻi, e pau koke ka hana ke alu like nā kānaka.
Ke Aolama 