ʻAʻole i pau ka hoʻouka kaua ʻana ma ʻIkelaʻela.
ʻO ia aʻela kekahi poʻo nūhou o kēia lā, ka lā 17 o Mei, he Pōʻakahi. Welina e nā makamaka. ʻO Ke Aolama kēia a penei ka nūhou.
ʻO ia mau nō ke kaua ʻana o ʻIkelaʻela me ka hui ʻo Hamas. A i ka Lāpule nei, hoʻopahū akula nā mokulele kaua o ka pūʻalikoa o ʻIkelaʻela i ke kūlanakauhale ʻo Gaza. A pau ihola kekahi mau hale ʻekolu. A he 26 mau kānaka a ʻoi aku i make aku nei. He hoʻokahi pule aku nei a emi iki mai, ʻo ia ka wā i hoʻomaka ai ka hoʻouka kaua nui ʻana ma waena o ke aupuni ʻo ʻIkelaʻela a me ka hui ʻo Hamas, a mai ia wā mai, ma ia hoʻopahū ʻana o ka Lāpule nei ka nui loa o nā kānaka i make. Ma waena o ia mau kānaka i make, he 10 mau wāhine a ʻewalu mau keiki. Aia nō kekahi mau aupuni ke hoʻāʻo akula e ʻuao i mea e pau ai ka hoʻouka kaua. A e hālāwai ana ka ʻAha Hoʻomaluhia o nā Lāhui Huipū no ke kūkākūkā ʻana.
Aia nō ke Keʻena ʻAuhau o Hawaiʻi ke hoʻoikaika akula ma ka ʻohiʻohi ʻana i nā ʻauhau uku ʻole ʻia mai nā kānaka na lākou e hoʻolimalima ana i nā wahi noho i ka poʻe malihini mākaʻikaʻi. I kēia makahiki nei, ua pau nā ʻauhau kahiko he $4.1 miliona i ka ʻohiʻohi ʻia. A e manaʻo ana ke Keʻena ʻAuhau, e hiki ana ia helu a i ka $12 miliona i ka hopena o kēia makahiki nei.
Eia mai kā kākou ʻōlelo noʻeau,
Hoʻi mai ʻo Makanikeoe.
ʻO ia hoʻi, ua hoʻi mai ka maluhia a me ke aloha.
Ke Aolama 