Aia nō ke Keʻena o ka Loio Kuhina a me ka hui ʻo KAHEA i mua o ka ʻAha Hoʻokolokolo Kiʻekiʻe o Hawaiʻi.
ʻO ia aʻela kekahi poʻo nūhou o kēia lā, ka lā 21 o Mei, he Pōʻalima. Welinae nā makamaka, ʻo Ke Aolama kēia a penei ka nūhou.
Ua hana aku nei ke Keʻena o ka Loio Kuhina i palapala kiʻi i mea e loaʻa ai nā palapala moʻohelu kālā o ka hui ʻo KAHEA. Hoʻāʻo aku nei ʻo KAHEA e hoʻopau aku i ia palapala kiʻi ma ka ʻAha Hoʻokolokolo Kaʻapuni. A i kēia manawa, aia i mua o ka ʻAha Hoʻokolokolo Kiʻekiʻe o Hawaiʻi. ʻO kekahi nīnau nui a nā luna kānāwai o ka ʻAha Kiʻekiʻe, he aha lā ke kumu e ʻimi nei ka loio kuhina i nā inoa o nā kānaka i hāʻawi manawaleʻa i makana a i kālā paha i KAHEA. ʻŌlelo ihola ka loio o KAHEA, ʻo Richard Naiwieha Wurdeman, ʻo ka manaʻo paʻa o ka loio kuhina, ʻo ia ka hoʻopaʻi ʻana i nā kānaka i manaʻo e hoʻōki i ke kūkulu ʻana i ka ʻOhe Nānā Kanakolu Mika.
Ua ʻae like aʻela ʻo ʻIkelaʻela a me Hamas e hoʻōki i ke kī pū a me ka hoʻopahū ʻana i ka Pōʻahā nei. He ʻumi kūmākahi lā o ke kaua ʻana. Ma Gaza, he 230 mau Palekekine a ʻoi aku i make. A ma waena o lākou, he 65 mau keiki a he 39 mau wāhine. A he 1,710 mau kānaka i ʻeha. Ma ʻIkelaʻela, he 12 mau kānaka i make. I hoʻomaka ke kaua ʻana i ka lā 10 o Mei i ka wā o nā koa Hamas ma Gaza i kī aku ai iā Ierusalema i nā kao lele pahū.
Eia mai kā kākou ʻōlelo noʻeau,
He keʻa puaʻa maka ʻolelepā.
ʻO ia hoʻi, he koa mākaha.
Ke Aolama 