Ua kiʻi aku nei ka Hōkūleʻa i ka lehu o Chad Kalepa Baybayan i ka Lāpule nei.
ʻO ia aʻela kekahi poʻo nūhou o kēia lā, ka lā 24 o Mei, he Pōʻakahi. Welina e nā makamaka. ʻO Ke Aolama kēia a penei ka nūhou.
ʻAkahi nō a hiki aku ka Hōkūleʻa i Hawaiʻi Moku no ke kiʻi ʻana aku i ka lehu o Chad Kalepa Baybayan i holo pū ʻo ia ma ka holo ʻana i ke kāʻei pāpūhea. He wā aʻo ia holo ʻana i nā mea waʻa hou. ʻŌlelo aʻela ʻo Nainoa Thompson, ka pelekikena o ka ʻAhahui Holomoana Polenekia, ʻo ka pahuhopu o ka AHP, e mākaukau he 120 mea waʻa hou ke hiki aku i ka hopena o ke kauwela i mea e mākaukau ai no ka Huakaʻi Moananuiākea o kēia makahiki aʻe. Aia ka Hōkūleʻa a me ka Hikianalia e kū ana ma Maui mai ka lā 13 o Mei, akā, ma muli o ke kūpikipikiʻō o ke kai o ʻAlenuihāhā, ua hoʻopaneʻe ʻia ka holo ʻana i ka mokupuni ʻo Hawaiʻi. A ma muli o kēlā, ʻaʻole e hiki aku i ke kāʻei pāpūhea. ʻO ka hana i kēia manawa, e holo ana ma o Kealaikahiki a holo loa i ka hema o Hawaiʻi moku me ka hoʻi ʻana mai i kēia Pōʻalima.
I kēlā mahina aku nei, ua koho pāloka ko Kāmoa i Kuhina Nui hou. ʻO Fiame Naomi Mataʻafa kona inoa. Akā, i ka Pōʻakahi, i ka hele ʻana aku o Mataʻafa i ka Hale ʻAha ʻŌlelo no ka lawelawe ʻana i ka hana, ʻaʻole i ʻae ʻia kona komo ʻana. A ʻōlelo aʻela ke Kuhina Nui ma mua, ʻo Tuilaepa Sailele Malielegaoi, ʻo ia ka mea e kū ana i ka moku. ʻO Malielegaoi ke kuhina nui no nā makahiki he 22 i hala aku nei a kohu mea lā, ʻaʻole ʻo ia e haʻalele ana i ke kūlana kuhina nui.
Eia mai kā kākou ʻōlelo noʻeau,
E kuʻi ka māmā a loaʻa ʻo Kaʻohele.
E hoʻoikaika i kō ka pahuhopu.
Ke Aolama 