Pāpā ʻia ke aʻo ʻana i ke kālaikuhi hoʻokae lāhui ma Tenesī.
ʻO ia aʻela kekahi poʻo nūhou o kēia lā, ka lā 26 o ka mahina ʻo Mei, he Pōʻakolu. Welina e nā makamaka. ʻO Ke Aolama kēia a penei ka nūhou.
He kānāwai hou ko Tenesī ma hope o ka pūlima ʻana o ke Kiaʻāina Bill Lee i ka Pōʻakahi nei. He kānāwai ia e pāpā ana, ʻaʻole e aʻo ʻia ke kālaikuhi hoʻokae lāhui ma nā kula aupuni. A inā ʻaʻe ʻia ua kānāwai lā, hiki ke hoʻopau ʻia ke kālā mai ke aupuni mokuʻāina mai. E hoʻomaka ka hoʻokō ʻia o ia kānāwai ma ka lā mua o Iulai. Ma ʻIkahō a me ʻOkalahoma nō hoʻi kahi kānāwai like e kū nei. A ua hāpai ʻia aʻe kekahi pila like ma kekahi mau mokuʻāina ʻē aʻe he 16.
Aia nō kekahi kanaka ma ke kūlana kūpilikiʻi ma ka haukapila ma muli o kona kī ʻia i ka pū e ka mākaʻi. Ua ʻōlelo ʻia, i ke kulu ʻana o ke aumoe o ka Pōʻalua nei, ma kahi o ka hapalua hola ʻumi kūmākahi, e hoʻāʻo ana kekahi mau mākaʻi e hopu aku i ia kanaka ma ke Ala Hikina. A kuhikuhi akula ia kanaka i kāna pū i kekahi mākaʻi, a ʻo ia ka wā a ua mākaʻi lā i kī aku ai iā ia. ʻAʻole i maopopo ka nui o nā pōkā i kū ai ke kanaka. Aia nō ka mākaʻi ke noiʻi akula.
Eia mai kā kākou ʻōlelo noʻeau,
He keiki aloha nā mea kanu.
Kohu keiki nā mea kanu a ka mahiʻai, he mālama pono ʻia.
Ke Aolama 