Noi ʻia ka Hui Mokulele ʻo Hawaiian i ke kōkua ma ka hoʻohaʻalele ʻana i nā kānaka iā ʻApekanikana.
ʻO ia aʻela kekahi poʻo nūhou o kēia lā, ka lā 23 o ka mahina ʻo ʻAukake, he Pōʻakahi. Welina e nā makamaka. ʻO Ke Aolama kēia a penei ka nūhou.
E kōkua ana ka Hui Mokulele ʻo Hawaiian ma ka hoʻohaʻalele ʻana i nā ʻAmelika a me nā kānaka ʻApekanikana nāna lākou i kākoʻo a hoʻihoʻi ʻia mai i ʻAmelika. He mau hui mokulele e kōkua ana, he ʻekolu mokulele mai ka Hui Mokulele ʻo American, ʻo Atlas Air, ʻo Delta, a me Omni Air, he ʻelua mokulele mai Hawaiian, a he ʻehā mokulele mai United. Hōʻike maila ʻo Jon Snook, ka hope pelekikena hoʻokō o ka Hui Mokulele ʻo Hawaiian, e lele ana nā mokulele i nā kahua hoʻolulu mokulele palekana, ʻaʻole e lele ana i ʻApekanikana. I kēia manawa, ʻo ka lā 31 o ʻAukake ka lā hope loa e pau ai nā kānaka i ka hoʻohaʻalele ʻia, akā, ʻōlelo aʻela ka Pelekikena Joe Biden, e hoʻopaneʻe ʻia aku paha.
Aloha nō. Ua ʻeha ihola ʻo John Ursua o nā ʻIokai o Sitala ma ke kūʻē ʻana aku iā Kenewa i ka Pōʻaono nei. Nahae iho nei ke oloolonā o kona kuli hema. A ʻaʻole e hiki ana iā Ursua ke pāʻani i kēia kikina pōpō peku. Ua eo ʻo Sitala iā Kenewa ma ka helu ʻai he 30 i ka 3. I ka makahiki 2017, i ka wā o Ursua e pāʻani ana no ke Kulanui o Hawaiʻi, ua nahae ke oloolonā o kona kuli ʻākau.
Eia mai kā kākou ʻōlelo noʻeau,
Alu ka pule i Hakalau.
ʻO ka ʻōlelo kēia e hoʻopuka ʻia aku ke pono ke alu like ʻana ma ka hana.
