E hū mai paha ka pele a kahe ma Kīlauea.
ʻO ia aʻela kekahi poʻo nūhou o kēia lā, ka lā 25 o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.
Nui nā ōlaʻi ma Kīlauea, Hawaiʻi i nehinei. A hiki i ka hapalua hola ʻehā o ke kakahiaka nui, he 140 mau ōlaʻi i helu ʻia. A ʻo ke ōlaʻi ikaika loa, he 3.3. Akā, ʻo ka hapanui, ma lalo ka ikaika o ka ʻekahi. A e mau ana nō nā ōlaʻi a hiki aku i ka hola 6:00 o ke kakahiaka, he 10 a ʻoi o ka hola. A ma muli o ka nui o nā ōlaʻi e manaʻo ʻia nei, e kahe ana ka pele ma lalo o ka ʻaoʻao hema o ia lua pele. ʻAʻole naʻe i puka mai ka pele. Akā, aia nō nā kānaka akeakamai o ka Hale Kilo Lua Pele Hawaiʻi ke makaʻala aʻela.
ʻAʻole kēia he wā maikaʻi e kipa mai ai iā Hawaiʻi nei. Pēlā ka ʻōlelo a ke Kiaʻāina David Ige i ka Pōʻakahi nei ma muli o ka māhuahua loa ʻana o nā kānaka i loaʻa iho nei i ke COVIDA. A ʻo ka ʻōlelo a Ige i nā kānaka o Hawaiʻi nei, ʻaʻole e huakaʻi wale aku i ka ʻāina ʻē, aia wale nō a he mea pono. A ke hiki aku i ka hopena o ʻOkakopa, e loli paha ka manaʻo, aia nō i ke emi a me ke emi ʻole paha o ia maʻi ma Hawaiʻi nei. ʻO kekahi poʻe, he kākoʻo i ia ʻōlelo a ke kiaʻāina, a ʻo kekahi, ʻaʻole.
Eia mai kā kākou ʻōlelo noʻeau,
ʻAʻohe ʻai pani ʻia o ka ʻamo.
He pane kīkoʻolā kēia i ke kanaka waha nina.
Ke Aolama 