He paipai i nā ʻŌiwi Hawaiʻi i ʻole e make hou kekahi i ka maʻi ahulau.
ʻO ia aʻela kekahi poʻo nūhou o kēia lā, ka lā 27 o ʻAukake, he Pōʻalima. Welina e nā makamaka. ʻO Ke Aolama kēia a penei ka nūhou.
ʻĀkoakoa aku nei kekahi mau Hawaiʻi Alakaʻi he 20 a ʻoi no ka paipai ʻana i nā kānaka Hawaiʻi e kōkua i mea e pau ai ka laha loa ʻana o ka maʻi COVID-19 ma ke komo ʻana i ke pale ihu, ka hoʻokaʻawale ʻana he ʻeono kapuaʻi a me ke ʻō ʻia ʻana i ka lāʻau koʻokoʻo. Wahi a ke Keʻena Ola, he 8,600 a ʻoi mau kānaka Hawaiʻi i loaʻa i ua maʻi lā. Mai ka wā i hoʻomaka ai ka pāhola ʻana o ia maʻi, he 500 a ʻoi mau kānaka Hawaiʻi i noho ma ka haukapila ma muli o ia maʻi, a he 75 o lākou a ʻoi aku a emi mai paha i make.
He keu aku a ke kupanaha. I ka makahiki 2018, ma hope iki o ka wā i ʻeha loa ai ka wāwae ʻākau o McKenzie Milton, ma ka pāʻani pōpō peku ʻana, ua kānalua ka hiki ʻana iā ia ke hele wāwae hou me ka ʻeha ʻole o ka wāwae. A eia kā ʻo Milton ke pāʻani hou aku nei a e hoʻomaka ana paha ʻo ia ma ke kūlana ʻalihi kūlele no ke Kulanui o Pololika Mokuʻāina. Ua ʻeha ihola ka wāwae o Milton i kona wā i hoʻokuʻi ʻia ai, nahae ihola kekahi aʻa koko a me kekahi mau oloolonā a pōʻino nō hoʻi kekahi aʻa lolo.
Eia mai kā kākou ʻōlelo noʻeau,
ʻAʻohe loaʻa i ka noho wale.
ʻAʻohe wahi mea e loaʻa mai, inā ʻaʻole e ʻeleu ma ka hana.
Ke Aolama 