Piha hauʻoli ka naʻau o ka ʻohana o kekahi mau kānaka ʻehiku i hoʻomake hewa ʻia ma Wilikinia.
ʻO ia aʻela kekahi poʻo nūhou o kēia lā, ka lā mua o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
I ka lā 2 o ka mahina ʻo Pepeluali o ka makahiki 1951 ma Matinawila, Wilikinia, ua hoʻomake ʻia ma ka noho uila he ʻehā mau kānaka Pāʻele ma ke kānāwai no ko lākou hoʻāhewa ʻia ʻana no ka puʻe ʻana i kekahi wahine haole. A he ʻekolu lā ma hope mai, hoʻomake ʻia he ʻekolu mau kānaka Pāʻele hou ma ka noho uila no ia kalaima like. Ua kapa ʻia aku lākou ʻehiku, ʻo ka Hiku o Matinawila. A i ka mahina ʻo Kēkēmapa o ka makahiki 2020, noi akula ka ʻohana o ia mau kānaka i ke Kiaʻāina o Wilikinia, iā Ralph Northam, e hoʻokuʻu ʻia lākou ʻehiku ʻoiai, he hoʻokae ʻili ʻiʻo nō ke kumu o lākou i hoʻomake ʻia ai. ʻAʻole i kaulike nā hana a pau mai ko lākou wā i hopu ʻia ai a i ko lākou wā i hoʻomake ʻia ai. A i ka lā i nehinei, ua hoʻokuʻu ʻia nō e ke kiaʻāina ʻo Francis DeSales Grayson, ʻo Booker T. Millner, ʻo Frank Hairston ʻŌpio, ʻo Howard Lee Hairston, ʻo James Luther Hairston, ʻo Joe Henry Hampton a me John Clabon Taylor.
Pihaʻū ke Kikowaena Lapaʻau o Hilo, ka haukapila nui loa o Hawaiʻi moku, ma muli o ka māhuahua ʻana aku nei o nā kānaka i loaʻa i ke COVIDA. He kanakolu kūmāwalu mau maʻi COVIDA e noho ana ma ia haukapila. A he ʻumi o lākou, aia ma ka māhele mālama maʻi kūpilikiʻi. A ʻo ka huina pau o nā maʻi ma ia māhele o ka haukapila, he ʻumi kūmāhiku. ʻO ka mea ʻāpiki, he lawa wale nō nā moe o ia māhele no nā maʻi he ʻumi kūmākahi.
Eia mai kā kākou ʻōlelo noʻeau,
Ka laʻi o Hauola.
ʻO ia hoʻi, ʻo ka maluhia a me ka ʻoluʻolu.
Ke Aolama 