Pōmaikaʻi kekahi mau ʻālapa o ke Kulanui o Hawaiʻi.
ʻO ia aʻela kekahi poʻo nūhou o kēia lā, ka lā 3 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.
I ka lā mua o ka mahina ʻo Iulai o kēia makahiki nei, ʻakahi nō a hiki ke lilo ke kālā a me ka pōmaikaʻi ʻē aʻe paha i ka ʻālapa haumāna o nā kulanui o ʻAmelika Hui Pū ʻIa. Ma mua o kēlā, ʻaʻole i ʻae iki ʻia ka lilo o kahi pōmaikaʻi i ka ʻālapa haumāna. Ua pūlima iho nei kekahi mau ʻālapa haumāna ʻewalu o ke Kulanui o Hawaiʻi i kahi palapala ʻaelike me ka Panakō o Hawaiʻi. ʻAʻole ʻo ke kālā wale nō ke lilo aku i ia mau ʻālapa, akā, ʻo ke aʻo ʻana i ka mālama kālā, ʻo ke aʻo ʻoihana a me ka hoʻomōhala ʻoihana a pēlā aku. ʻO ia mau ʻālapa, ʻo ia ʻo Amber Igiede lāua ʻo Brooke Van Sickle, he mau mea pāʻani pōpō paʻipaʻi wahine, ʻo Chaz Galloway lāua ʻo Max Rosenfeld, he mau mea pāʻani pōpō paʻipaʻi kāne, ʻo Kelsie Imai lāua ʻo Daejah Phillips, he mau mea pāʻani pōpō hīnaʻi wahine, a me Samuta Avea lāua ʻo Kamaka Hepa, he mau mea pāʻani pōpō hīnaʻi kāne. Ma ka mahina ʻo Iulai, pūlima aku nei ʻo Chevan Cordeiro, ke ʻalihikūlele o nā Koa Ānuenue, i ka palapala ʻaelike me ka Panakō ʻo Central Pacific.
Eia mai kā kākou ʻōlelo noʻeau,
Eia aʻe ka makani Kona.
ʻO ia hoʻi, aia kahi kanaka huhū ke hele maila.
Ke Aolama 