He makana paha ke lilo aku i ka poʻe ʻō ʻia.
ʻO ia aʻela kekahi poʻo nūhou o kēia lā, ka lā 8 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
He polokalamu hoʻopaipai ko ke aupuni o Hawaiʻi i mea e māhuahua aʻe ai ka poʻe e ʻō ʻia i ka lāʻau koʻokoʻo COVIDA-19. Inā ua ʻō ʻia ʻoe i ka lāʻau koʻokoʻo he hoʻokahi manawa, hiki nō iā ʻoe ke kākau inoa ma https://higotvaccinated.com/. A e lilo paha kahi makana iā ʻoe. ʻAkahi nō a lilo aku he $5,000 iā Steven Kam, he kumu kula aupuni ma ke Kula Kiʻekiʻe o Pearl City. A he ʻelua hou aku mau kānaka ʻō ʻia e lilo ai he ʻelima kaukani kālā. A he mau makana ʻē aʻe ke lilo aku. I kēia manawa, he 64.4 pākeneka o nā kānaka o Hawaiʻi nei i ʻō ʻia a pau pono. A he 72.6 i ʻō ʻia i ka māhele lāʻau koʻokoʻo hoʻokahi.
ʻAkahi nō a hiki aku ke kumu kūʻai kūwaena o ka hale no ka ʻohana hoʻokahi i ka hoʻokahi miliona kālā ma ʻAukake. I ka mahina ʻo Ianuali o kēia makahiki nei, he $883,000 ke kumu kūʻai kūwaena, a piʻi liʻiliʻi aʻela a ka $992,500 ma Iulai. Ma Kauaʻi a me Maui, ua hiki ʻē aku ke kumu kūʻai kūwaena i ka miliona kālā. Ma Kauaʻi, ma Ianuali nō. A ma Maui, ma Mei.
Eia mai kā kākou ʻōlelo noʻeau,
Hāiki Kaʻula i ka hoʻokē a nā manu.
ʻO ia hoʻi, ua hele kekahi wahi a piha pūʻikaʻika loa.
Ke Aolama 