09-10-21

He keu kekahi wahine o Hawaiʻi nei a ka pōmaikaʻi.

ʻO ia aʻela kekahi poʻo nūhou o kēia lā, ka lā 10 o Kepakemapa, he Pōʻalima. Welina e nā makamaka heluhelu. ʻO Ke Aolama kēia a penei ka nūhou.

Lilo hou aku nei he $5,000 i kekahi wahine ma ka polokalamu hoʻopaipai #higotvaccinated o Hawaiʻi. ʻO Angela Yao ka inoa o ua wahine lā. No Waiʻanae ʻo ia a ʻo ia ka lua o ke kanaka i lilo ai he $5,000. E kūkala koke ʻia ana ke kolu o ke kanaka. ʻO Yao, he haumāna lapaʻau ʻo ia ma ke Kulanui Kaiāulu ʻo Kapiʻolani. ʻO ia polokalamu hoʻopaipai, hoʻomaka aku nei ma ka mahina ʻo Iune, a e lilo aku ana kekahi mau makana i kekahi mau kānaka i ʻō ʻia i ka lāʻau koʻokoʻo COVID-19. A ʻakahi no a hoʻomaka kekahi polokalamu hoʻopaipai i kapa ʻia ʻo “Vax Da Max Milestone” i kēlā mahina aku nei. ʻO ka poʻe hiki ke kākau inoa no ia polokalamu hou, ʻo ia ka poʻe i ʻō ʻia ma ka lā ʻeiwa o ʻAukake a ma hope mai paha.

Hahana nō ka hoʻokūkū pōpō pekupeku o ka pō Pōʻahā nei kahi e kūʻē aku ana nā Kaopoe o Dallas i nā Pōā Moku o Tampa Bay. Mai eo nā Pōā Moku. He hoʻokahi minuke koe me nā kekona he 24, e ʻoi aku ana nā Kaopoe ma ka helu ʻai he 29 i ka 28. A hiu aʻela ʻo Tom Brady me nā Pōā Moku a ka laina ʻīā 36. I ia manawa, he ʻelua wale nō kekona i koe. A peku akula ʻo Ryan Succop i ka ʻai peku a loaʻa ai nā ʻai i lanakila ai ʻo Tampa Bay, he 31 i ka 29. ʻO Brady, he 379 āna ʻīā i nou ai, a he ʻehā āna ʻai holo.

Eia mai kā kākou ʻōlelo noʻeau,

Hele a kahu ka ʻena.

He ʻōlelo no ke kanaka i hele a huhū loa.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s