09-13-21

 ʻO ia mau nō ka hiki ʻole i ke kanaka ke mākaʻikaʻi aku i ka hoʻokūkū pōpō pekupeku ma ke kahua pāʻani hou.

ʻO ia aʻela kekahi poʻo nūhou o kēia lā, ka lā 13 o Kepakemapa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.

He ulia kaʻa kai ʻike ʻia ma ke Alaloa ʻo Farinatona ma Mākaha i ka wanaʻao o ka Lāpule nei. He hoʻokahi wale nō kaʻa, a he ʻeono mau kānaka o luna o ia kaʻa, he kanaka makua a me nā ʻōpiopio he ʻelima. ʻO ke kanaka makua, ua ʻeha kūpilikiʻi ʻo ia. A ʻo nā ʻōpiopio a pau, ua ʻeha kūkonukonu. ʻO kekahi o lākou, ua haʻalele i kahi o ka ulia ma mua o ka hiki ʻana aku o nā kaʻa lawe maʻi.

Ua eo ʻo Hawaiʻi iā ʻOlekona Mokuʻāina ma ka pōpō pekupeku i ka hopena pule nei ma ka helu ʻai he 45 i ka 27. Ma ka hopena o ka hapahā mua, e ʻoi ana nā Piwa ma ka helu ʻai he 21 i ka hua kakā a nā Ānuenue. Akā, ma ka hapahā ʻelua, ua hiu aʻela ka ʻaoʻao kūpale o Hawaiʻi a he ʻai peku wale nō kā nā Piwa. Akā, ma ia hope mai, he mau ʻai holo kā Hawaiʻi, a pēlā hoʻi ʻo ʻOlekona Mokuʻāina. ʻO Chevan Cordeiro, he 331 āna ʻīā i nou ai, a he ʻelua ʻai holo, a ʻapo lilo ʻia ʻelua manawa.

A i kēia Pōʻaono, e kūʻē ana ʻo Hawaiʻi iā San Jose State. A aia ana nō ma ke kahua pāʻani hou o ke Kulanui o Hawaiʻi ma Mānoa. A he manaʻo ko ka luna ʻālapa, ko David Matlin, e ʻae ʻia kekahi mau kānaka mākaʻikaʻi ma ka hoʻokūkū ʻana me San Jose State. Wahi a Matlin, he mea nui ke ola kino o ka lehulehu. A he manaʻo kona, he hiki ke mākaʻikaʻi kekahi mau kānaka me ka palekana ma muli o nā lula no ke ʻō ʻia ʻana i ka lāʻau koʻokoʻo a me ke kau ʻia ʻana o ke pale ihu a me ka polokalamu hōʻoia ʻo Lumisight. Noi aku nei ʻo Matlin i ka Meia Rick Blangiardi i ka ʻae ʻana i nā kānaka he 500, nā ʻohana a me nā hoa aloha o nā mea pāʻani, e mākaʻikaʻi i ka hoʻokūkū o kēia Pōʻaono. Hōʻike akula ka meia i ke noi i ke Kiaʻāina David Ige, a hōʻole ʻia maila.

Eia mai kā kākou ʻōlelo noʻeau,

He nani wale nō ʻo Puna mai ʻō a ʻō.

ʻO ia hoʻi, ʻaʻohe mea e namunamu ai.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s