Ua nalowale iho nei kekahi kaikamahine o Waimānalo.
ʻO ia aʻela kekahi poʻo nūhou o kēia lā, ka lā 15 o Kepakemapa, he Pōʻakolu. Welina e nā makamaka heluhelu. ʻO Ke Aolama kēia a penei ka nūhou.
Huliāmahi aʻela kānaka ma ka ʻimi ʻana aku nei iā Isabella Kalua i nā lā ʻelua i hala iho nei ma Waimānalo, Kailua a me Kaʻelepulu. ʻAʻole naʻe i loaʻa mai ua kaikamahine nei. He ʻeono makahiki o Kalua, a ʻo kona manawa i ʻike hope loa ʻia ai, ʻo ka hola 9:00 o ke ahiahi Lāpule nei ma kona hale ma Waimānalo. ʻO Melanie Joseph ka lūauʻi makuahine o Kalua akā, e hānai ʻia ana ʻo Isabella, kona kaikuaʻana a me kona mau kaikaina ʻelua e Sonny lāua ʻo Lehua Kalua. Akā, ma hope o ka nalowale ʻana o Isabella, lawe ʻia akula ia ma kaikamāhine ʻehā e ke Keʻena Pono Kamaliʻi i ka Pōʻakahi nei.
Lilo mai nei he $28 miliona mai ke aupuni pekelala i kekahi mau polokalamu hoʻonaʻauao ʻŌiwi Hawaiʻi he 35. He puʻu kālā ia no loko mai o ka Papahana Hoʻopakele ʻAmelika a me ka Polokalamu Hoʻonaʻauao ʻŌiwi Hawaiʻi. ʻO Papa Ola Lōkahi kekahi hui i pōmaikaʻi. Lilo mai nei he $740,577 iā Papa Ola Lōkahi no ke kākoʻo ʻana i nā haumāna he 60 a me ko lākou mau ʻohana ma Waiʻanae, Waimānalo, Hōnaunau a me Ocean View. A lilo mai nei he $776,400 iā Maui Family Support Services no ke kōkua ʻana i nā ʻohana ʻōpiopio ma ke Kalana ʻo Maui. A lilo mai nei he $260,948 i ka Hula Preservation Society no kekahi polokalamu hoʻonaʻauao hou e kaʻana like ana i nā moʻolelo o nā kumu hula a me nā kūpuna me nā keiki ma nā kula aupuni, nā kula hoʻāmana a me nā kula kaiapuni. A e hoʻomōhala ʻia ana nā haʻawina ma ka ʻōlelo Hawaiʻi kekahi. A he mau polokalamu hou aku nō e pōmaikaʻi ai ka Hawaiʻi.
Eia mai kā kākou ʻōlelo noʻeau,
Ka lei hāʻule ʻole, he keiki.
E mālama pono ʻia ke keiki.
Ke Aolama 