09-17-21

E hoʻomau ʻia aku ana ka huli ʻana aku i ke kaikamahine o Waimānalo i nalowale.

ʻO ia aʻela kekahi poʻo nūhou o kēia lā, ka lā 17 o Kepakemapa, he Pōʻalima. Welina e nā makamaka heluhelu. ʻO Ke Aolama kēia a penei ka nūhou.

ʻAʻole i loaʻa mai ʻo Isabella Kalua, a no laila, e hoʻomau ʻia ana ka huli ʻana aku iā ia. Ua loaʻa mai nei kekahi mau mea i manaʻo ʻia na Kalua nō. He ʻeke hāʻawe paha kekahi mea i loaʻa a me kekahi mau mea hou aku. Hōʻike aʻe nei ke Keʻena Hoʻonaʻauao, he haumāna ʻo Kalua ma ka papa māla aʻo o ke Kula Haʻahaʻa o Waimānalo i kēlā makahiki kula aku nei. A ma Iune o kēia makahiki nei, waiho aku nei nā mākua hānai o Kalua i nā palapala no ka haʻalele loa ʻana o ke kaikamahine i ke Kula Haʻahaʻa o Waimānalo a e kula home ʻia. He nui nō nā kānaka a me nā hui e kōkua ana ma ka huli ʻana iā Kalua.

ʻĀpono aku nei ka Papa Hoʻonaʻauao i ka hoʻololi ʻana aku i ka inoa o ke Kula Waena ʻo Central a e kapa ʻia aku ma ka inoa o ke Aliʻiwahine Ruth Keʻelikōlani. ʻO Keōua Hale ka inoa o ka hale o ke Aliʻiwahine, a aia nō ma kahi e kū nei ke kahua o ia kula waena i kēia manawa. He mau inoa ko ia kula mai ka makahiki 1895. ʻO ke Kula Kiʻekiʻe o Honolulu kona inoa mua, a ma hope o kona haʻalele ʻana i ia ʻāina, ʻo Central Grammar ka inoa. A ma hope mai, ua hoʻololi ʻia ka inoa a ma ka inoa o ia Aliʻiwahine aloha nui ʻia, ʻo ia hoʻi, ʻo ke Kula ʻo Keʻelikōlani, no kahi wā pōkole. A ma hope mai, kapa hou ʻia ma ka inoa ʻo Central ma kekahi mau ʻano.

Eia mai kā kākou ʻōlelo noʻeau,

I Kahiki ka ua, ako ʻē ka hale.

ʻO ia hoʻi, e hoʻomākaukau a mākaukau ma mua o ka hiki ʻana mai o ka ʻino.