ʻAkahi nō a loaʻa ke kanaka o ʻAmelika Kāmoa i ka maʻi COVIDA.
ʻO ia aʻela kekahi poʻo nūhou o kēia lā, ka lā 20 o Kepakemapa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.
Ua mālama ʻia aku nei he wikilia no Isabella Kalua ma ka Pāka ʻĀpana o Waimānalo i ka Lāpule nei. Ua nalowale ʻo Kalua i kēlā Lāpule aku nei i ka lā 12 hoʻi o Kepakemapa. ʻIke hope loa ʻia akula ʻo ia ma kona hale ma Waimānalo i ka hola ʻeiwa o ke ahiahi. Ua nui ka mahalo o ka ʻohana o Kalua i ka poʻe i kōkua a kākoʻo ma nā ʻano hana like ʻole a me ka poʻe i hele aku i ka wikilia. Ua hōʻike mai ʻo Jamie Kumai, he ʻohana a ʻo ka waha ʻōlelo hoʻi o ka ʻohana, e hoʻomau ʻia ana ka huli ʻana, ʻaʻole naʻe e hoʻolālā ʻia ma ka pāka.
Kūkala ʻia aʻela ke kanaka mua loa i loaʻa i ke COVIDA-19 ma Kāmoa ʻAmelika. ʻO ia kanaka, ua huakaʻi i ʻAmelika a i Hawaiʻi nei i kēlā pule aku nei a hoʻi aku nei i Kāmoa i ka lā 13 o Kepakemapa. ʻO ia kanaka, ua ʻō ʻia aku nō i ka lāʻau koʻokoʻo a pau pono. E hoʻomalu maʻi ʻia ana ʻo ia ma kahi kaʻawale no nā pule ʻelua.
Ua ʻeha ihola ka iwi ʻaoʻao o tua Tagovailoa ma ka hoʻokūkū pōpō peku o ka Lāpule nei. Ma ka hapahā mua nō i ʻeha ai, a huki ʻia ʻo ia mai ka pāʻani ʻana. A ʻaʻole ʻo ia i komo hou. Ua lilo ke eo iā Pāpulō ma ka helu ʻai he 35 i ka hua kakā a Miami.
Eia mai kā kākou ʻōlelo noʻeau,
Hānau ʻia i ka pō Lāʻau, lāʻau nā iwi, he koa.
He ʻōlelo no ke kanaka wiwoʻole.
Ke Aolama 