09-22-21

Ua moe aku nei kahi kiʻi maka nunui o Hawaiʻi nei i ka moe kapu o Niolopua.

ʻO ia aʻela kekahi poʻo nūhou o kēia lā, ka lā 22 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua hala akula kahi kanaka kaulana o Hawaiʻi i ke ala hoʻi ʻole mai i ka ʻauinalā o ka Pōʻalua nei. ʻO Al Harrington nō, a ua piha nā makahiki he kanawalu kūmālima iā ia. I kēlā pule aku nei, ua loaʻa ʻo Harrington i ke kūhewa a ma muli paha o ka pilikia i ke kūhewa i lele ai ke aho hope loa. Ua hānau ʻo ia ma Kāmoa ʻAmelika, kahi a kona kupunahine i mālama ai iā ia, a laila, i ka wā i piha ai nā makahiki ʻekolu iā ia, neʻe maila ʻo ia i Honolulu nei no ka noho ʻana me kona makuahine. Ma hope mai, ua pāʻani pōpō peku ʻo ia ma ke Kulanui ʻo Kanapola a paʻa ihola nō hoʻi ke kekelē ma ka moʻolelo. Hōʻole aku nei i ka pāʻani pōpō peku me Baltimore ma ke ʻano he loea. Holo ihola kona manaʻo e hele i ka mikiona Molemona ma Kāmoa. A i kona hoʻi ʻana mai i Hawaiʻi, lilo ihola ʻo ia i kumu kula a i kumu pōpō peku nō hoʻi ma ka Punahou. A ʻo kekahi mea i kaulana ai ʻo Harrington, ʻo ia kona lilo ʻana i mea hana keaka ma “Hawaiʻi Five-0.”  Ua haʻalele maila ʻo Harrington i hope nei i kāna wahine, iā Rosa, iā Alema lāua ʻo Tau, kāna mau keiki kāne, iā Summer Harrington lāua ʻo Cassi Harrington Palmer, kāna mau kaikamāhine a me nā moʻopuna.

Kau ana kekahi mau kula aupuni o Hawaiʻi i ka hano hāweo. Ua koho ʻia ʻekolu mau kula aupuni, he mau Kula Lipine Polū o ʻAmelika. ʻO nā kula ʻekolu,ʻo ia ke Kula Waena ʻo Wheeler ma Wahiawā, ke Kula Haʻahaʻa o Mānoa a me ke Kula Haʻahaʻa o Maʻemaʻe ma Nuʻuanu. ʻO ka nui o nā kula i koho ʻia ma ʻAmelika a puni, he 325 wale nō.

Eia mai kā kākou ʻōlelo noʻeau,

Ola i ke ahe lau makani.

Hoʻopuka ʻia kēia,  ke pā mai ka makani ʻolu i ka lā wela.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s