Ua loaʻa paha ka mea e mālama pono ʻia ai ʻo Hawaiʻi nei ma loko o ka nui o nā malihini mākaʻikaʻi kipa mai.
ʻO ia aʻela kekahi poʻo nūhou o kēia lā, ka lā 27 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.
Ua huliāmahi aku nei kekahi mau Hawaiʻi Alakaʻi, i hui pū ma ke ʻano he kōmike hoʻokele, me ke Keʻena Mālama Malihini Mākaʻikaʻi o Hawaiʻi nei ma ka hoʻolālā ʻana i ka hana e pono ai ʻo Oʻahu nei i ke kipa ʻana mai o nā malihini mākaʻikaʻi. I ka makahiki 2019, ua ʻoi aku ka nui o nā malihini mākaʻikaʻi o ka makahiki i ka 10 miliona. Ma muli o ia alulike ʻana, paʻa ihola kahi hōʻike, e wehewehe ana i nā hana a me nā pahuhopu i mea e hoʻomōhala hou ai i ka ʻoihana hoʻomākaʻikaʻi malihini ma Oʻahu nei ma nā makahiki ʻekolu e hiki mai ana. Ua hana nō hoʻi ke Keʻena Mālama Malihini Mākaʻikaʻi i hōʻike no nā mokupuni ʻē aʻe. Manaʻo ihola kekahi poʻe o ke kōmike, ʻaʻole i lawa nā mea i kākau ʻia ma ka hōʻike a ʻaʻole nō hoʻi i lawa nā makahiki ʻekolu. ʻO kekahi pilikia, ʻakahi a ʻoki ʻia kekahi mau kūlana hana a me ka moʻohelu kālā o ke Keʻena Mālama Malihini Mākaʻikaʻi.
He manaʻo ko kekahi poʻe, e maʻalahi ke ala e hiki aku ai i ke kai o Wailupe. I kēia manawa, ua kī ʻia a paʻa nā ala maʻalahi ʻekolu e hiki aku ai i ke kai mai ka pīpā alanui ma ke Ala Pōʻai o Wailupe. He ʻelua ala e hiki aku ai ka lehulehu i laila i kēia manawa, akā, he hana nui. Wahi a ka Luna ʻAha Kūkā Tommy Waters, ua kamaʻilio kekahi mau kānaka o kona ʻāpana no ia nīnau a aia nō ʻo ia ke noiʻi akula.
Eia mai kā kākou ʻōlelo noʻeau,
Eia ke kānaenae a ka mea hele: he leo, he leo wale nō.
He ʻōlelo kēia na ke kama hele, ke kāʻalo aku i kona hoa e hōʻike ana, ʻaʻole hiki iā ia ke kipa a noho iki.
Ke Aolama 