09-29-21

He nāhelehele ʻino, ua loaʻa ma ka mokupuni ʻo Hawaiʻi.

ʻO ia aʻela kekahi poʻo nūhou o kēia lā, ka lā 29 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

I kēia makahiki nei, ʻakahi nō a loaʻa kekahi nāhelehele uluāhewa koke ma ka ʻaoʻao hikina o ka mokupuni ʻo Hawaiʻi. ʻO Chromolaena odorata kona inoa ʻepekema, a ʻo kekahi inoa ona, ʻo ka nāhelehele kepalō. He lau nahele ia e hiki ai ke make ka pipi ke ʻai aku. A ʻo kekahi, he ʻaʻā koke loa. A ke hopohopo ihola nā luna aupuni o pilikia auaneʻi ka ʻoihana pipi i ua nāhelehele lā, a ʻo ke kumu ana ia o ke ahi ʻā wale ma ka nahele o Hawaiʻi Kuauli. Ua loaʻa mua nō ka nāhelehele kepalō ma ka mokupuni ʻo Oʻahu i ka makahiki 2011.

Koho mai nei ka Pelekikena Joe Biden iā Clare Connors, ʻo ia ana ka loio kuhina ʻAmelika Hui Pū ʻIa o ka ʻĀpana ʻo Hawaiʻi. Aia a holo pono ka hōʻoia ʻana, a laila e paʻa ia hana iā Connors. ʻO Punahou kona kula kiʻekiʻe i puka mai ai. He hope loio kuhina ʻAmelika Hui Pū ʻIa ʻo ia ma mua, a i kēia manawa, ʻo ia nō ka loio kuhina o Hawaiʻi nei. I ka makahiki 2019 i hoʻomaka ai kona lawelawe ʻana i ka hana ma ia kūlana.  

Eia mai kā kākou ʻōlelo noʻeau,

Hao mai ka makani, kuakea ka moana; hao mai ke kai, kū ke koʻa i uka.

He ʻōlelo ke hele a huhū kekahi.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s