He noi kā Scott Saiki i ke Kiaʻāina David Ige no ka hoʻokūkū pōpō peku o ke Kulanui o Hawaiʻi.
ʻO ia aʻela kekahi poʻo nūhou o kēia lā, ka lā 1 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.
Haluku aku nei nā kānaka he nui i ka Pāka Lua Pele o Hawaiʻi no ka nānā ʻana aku i ka luaʻi ʻana aʻe o ka pele ma ka lua pele o Kīlauea. A e māhuahua aʻe ana paha kānaka i kēia hopena pule a no laila, e hoʻomaopopo mai ana waha ʻōlelo o ka pāka, e hana pono i ʻole e pōʻino ke ola a me ke kino paha. A ʻo kekahi, ʻo ka wā maʻi ahulau nō hoʻi kēia, a no laila, e kū kaʻawale he ʻeono kapuaʻi mai ke kanaka aku, a inā aia paha ma kahi hāiki e hiki ʻole ai, e kau ke pale ihu. A ma nā ala wale nō i māka ʻia e hele ai. A mai ʻaʻe aku i nā wahi i pani ʻia o pōʻino auaneʻi. E hemo ana ka pāka he 24 hola o ka lā.
Noi aku nei ka Luna Hoʻomalu o ka Hale o nā Lunamakaʻāinana, ʻo Scott Saiki, i ke Kiaʻāina David Ige i ka ʻae ʻana i ke anaina mākaʻikaʻi ma ka hoʻokūkū pōpō peku o ke Kulanui o Hawaiʻi i kēia Pōʻaono kahi a lākou e kūʻē ana iā Fresno State, ʻoiai, ʻo ka hoʻokūkū hoʻolauleʻa ia a ʻo ka lā kipa hoʻi o nā kānaka i puka mai ia kulanui. ʻO kekahi manaʻo o Saiki, e kau palena ʻia ka nui o nā kānaka mākaʻikaʻi me ka ʻōlelo pū ʻana, ua mākaukau nō ke Kulanui o Hawaiʻi no ka hoʻokō ʻana i nā lula maʻi ahulau e pono ai. Hāpai aʻela ʻo Saiki i kekahi mau mea āna e manaʻo nei e emi loa ai ka laha ʻana o ke COVIDA-19. ʻO kekahi, ʻo ke koi ʻana i ka hōʻike i ka palapala ʻō lāʻau koʻokoʻo; ke koi ʻana i ke komo i ke pale ihu, koe naʻe i ka wā e ʻai ana a e inu ana paha; ʻo ke kaʻawale ʻana he ʻeono kapuaʻi; ʻo ka waiho aku o ke kope wai lāʻau ma ʻō a ma ʻaneʻi o ke Kahua Pāʻani ʻo Ching; a me ka hoʻokoʻikoʻi ʻana i ka manaʻo, ʻaʻole e komo nā kānaka i ʻō ʻole ʻia i ka lāʻau koʻokoʻo.
Eia mai kā kākou ʻōlelo noʻeau,
Ka wahine ʻai lāʻau o Puna.
ʻO ia hoʻi, ʻo Pele ia.
Ke Aolama 