Ua eo ka hui pōpō peku helu 18 o ke ao nei iā Hawaiʻi.
ʻO ia aʻela kekahi poʻo nūhou o kēia lā, ka lā 4 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.
Hanini ihola ka ʻaila ma ke kai o Kaleponi Hema i ka Lāpule nei. He 126,000 kālani a ʻoi aku. Aia nō ma ke kai o ke Kalana ʻo ʻAlani. A nui nā iʻa a me nā manu i make aku nei i ka ʻaila. E hana ana nā kānaka i mea e laha ʻole ai ka ʻaila akā, lana ʻē aʻela ka ʻaila he mau mile. A pani ʻia akula ke kahakai mai ka Uapo Kahakai o Huntington a i ka uapo o ke Kahawai o Santa Ana, he ʻehā mile ka lōʻihi a emi mai. A ʻo ia wahi, he ʻāina ia kahi e noho ai kekahi mau manu ʻaneʻane e nalowale loa. I ke kakahiaka o ka Lāpule nei, ʻaʻole i pau pono ka hanini ʻana, akā, e noke ana nā kānaka i ka hoʻoponopono ʻana.
ʻĀhaʻi aku nei nā Koa Ānuenue i ka lanakila ma ka pōpō pekupeku i ka Pōʻaono nei ma ka helu ʻai he 27 i ka 24. ʻO Fresno State ka hoa paio, a ʻo ia ka hui helu 18 o ke ao nei. Ua ʻōmaʻimaʻi ʻo Chevan Cordeiro no laila, ʻo Brayden Schager ka mea i pani i ka mākālua. A maikaʻi wale kāna hana. Ma ka hapahā hope loa, he 12 minuke a he ʻeono kekona i koe, na Schager i alakaʻi aku i nā Ānuenue a loaʻa ʻelua ʻai holo a hoʻokahi ʻai peku. ʻAʻole i kana mai ka ʻeleu o ka ʻaoʻao kūpale, lilo aku nei ke kinipōpō iā lākou he ʻeono manawa. A ʻo ka lilo hope loa, aia ʻo Fresno State ma kahi o ka laina ʻumi ʻīā o Hawaiʻi. Nou aʻela ke ʻalihikūlele o Fresno i ka pōpō, a pā ka lima o Ty Jones o Fresno, a lele akula, a hopu ʻo Hugh Nelson II o Hawaiʻi a he ʻeiwa wale nō kekona i koe.
Eia mai kā kākou ʻōlelo noʻeau,
Hānau ʻia i ka pō Lāʻau, lāʻau nā iwi, he koa.
He ʻōlelo kēia no ke kanaka wiwoʻole.
Ke Aolama 