Pilikia nā mākua mea keiki i ka lawa ʻole o nā limahana o ka polokalamu A+.
ʻO ia aʻela kekahi poʻo nūhou o kēia lā, ka lā 6 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.
Ua pōkole nā limahana o ka polokalamu A+ a kūpilikiʻi ihola kekahi mau mākua mea keiki a puni kēia pae ʻāina. ʻO ka polokalamu A+, he polokalamu mālama keiki ia ma hope o ke kula. I kēia manawa, ma kahi o ka 1,600 mau keiki kula haʻahaʻa e kali ana ʻo ke komo aku i loko o ka polokalamu A+ ma nā kula aupuni o Oʻahu nei e mālama ʻia ana e ka YMCA o Honolulu. A ma kahi o ka 1,000 mau keiki kula haʻahaʻa ma kekahi mau mokupuni ʻehā e mālama ʻia ana e Kamaʻāina Kids.
Kau aku nei kekahi mau Koa Ānuenue ʻelua i ka hano hāweo. ʻO kekahi, ʻo Brayden Schager. Ua koho ʻia ihola ʻo Schager, ʻo ia ka Haumāna Komo Hou ʻOi o ka Pule o ka ʻAhahui Mauna Komohana. A ʻo ka lua, ʻo Khoury Bethley. Ua koho ʻia ihola ʻo Bethley, ʻo ia ka Mea Pāʻani Kūpale ʻOi o ka Pule o ka ʻAhahui Mauna Komohana. A lilo nō hoʻi kekahi makana iā Bethley, ʻo ia ka makana ʻo Bronko Nagurski no ka Mea Pāʻani Kūpale ʻOi o ka Pule o ʻAmelika Hui Pū ʻIa. ʻAʻohe hoa paio o Hawaiʻi i kēia pule. I ka lā 16 o ka mahina ʻo ʻOkakopa ka hoʻokūkū hou ʻana me Nevada.
Eia mai kā kākou ʻōlelo noʻeau,
Hāʻupu mauna kilohana i ka laʻi.
He ʻōlelo kēia no ke kanaka kū i ka niʻo.
Ke Aolama 