10-08-21

ʻO nā Makana Hōkū Hanohano, makana ʻia aku nei i ka pō nei.

ʻO ia aʻela kekahi poʻo nūhou o kēia lā, ka lā 8 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

E hoʻomaka ana kekahi polokalamu hou o ke Kūlanakauhale o Honolulu i kapa ʻia ʻo CORE i loko o nā pule ʻelua e hiki mai ana. He polokalamu ia no ka pane ʻana i nā ulia pōpilikia hanahana ʻole o ka poʻe kuewa. ʻO ka mea maʻa mau, inā kāhea ke kanaka kuewa i ka helu 911, ʻo ka mākaʻi a me ke kahu lapaʻau ulia ke hiki aku i ona lā, a i ka hapanui o ka manawa, ʻo ia ka mea e pono ai. Akā, i kekahi manawa, he pilikia ia e pōʻino ʻole ai ke kanaka, a no laila i hoʻokumu ʻia ai ʻo CORE. Ma ia polokalamu, e ana a e hoʻoholo ka limahana hoʻouna hikiwawe 911 inā he kūpilikiʻi, he kūkonukonu a he mea iki paha. Aia a he ulia pōpilikia kūpilikiʻi a kūkonukonu paha, a laila, ʻo ke Kinai Ahi, ka Mākaʻi a me ke Kahu Lapaʻau Ulia paha ke hoʻouna hikiwawe ʻia, ʻo nā mea hoʻi e pono ai. Akā, inā he mea iki, ʻo ke Kahu Lapaʻau Ulia a me kekahi limahana ola kino ke hoʻouna koke ʻia. A ʻo kekahi mea hou, ma hope o ka hoʻokuʻu ʻia ʻana o ke kanaka kuewa, ʻaʻole e pau kona kōkua ʻia ʻana. E mālama ʻia ana ka pilina a e ʻimi ana i wahi noho nona.

Mālama ʻia aku nei ka ʻAha Makana Hōkū Hanohano o ka makahiki 2021 i ka pō nei. ʻAʻole naʻe i like me nā makahiki i hala ma muli o ka maʻi ahulau. Ua paʻi wikiō ʻia nā māhele like ʻole ma ka Hale Keaka ʻo Hawaiʻi i Kepakemapa Lilo aku nei nā makana he ʻehiku i ke pā leo ʻekolu a Kainani Kahaunaele i kapa ʻia ʻo Waipunalei. ʻO nā māhele i lilo ai nā makana i ia pā leo, ʻo ke pā leo ʻoi o ka makahiki, ʻo ka puʻukani wahine ʻoi, ʻo ke pā leo Hawaiʻi ʻoi, ʻo ke mele ʻoi o ka makahiki, ʻo ka haku mele ʻoi a me ka hīmeni ʻōlelo Hawaiʻi ʻoi. ʻO ka makana pā leo ʻoi o ka makahiki, he ʻelua makana, lilo kekahi i ka puʻukani, a lilo kekahi i ka luna hoʻopuka a ʻo Kahaunaele ka luna hoʻopuka o kāna pā leo. He ʻehā makana i lilo iā Lukela Keala o ka hui ʻEkolu. He ʻekolu makana i lilo iā Iolani lāua ʻo Natalie Ai Kamauu. He ʻelua makana o Henry Kapono. A pēlā pū me Keilana a me Zachary Alakai Lum.

Eia mai kā kākou ʻōlelo noʻeau,

He ʻaloʻalo kuāua no kuahiwi.

He ʻōlelo kēia no ke kanaka wiwo ʻole.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s