E lilo ana kahi puʻu kālā i kekahi mau ʻŌiwi Hawaiʻi i hoʻopiʻi aku i ke aupuni mokuʻāina.
ʻO ia aʻela kekahi poʻo nūhou o kēia lā, ka lā 27 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.
Holo ihola ka manaʻo o nā loio o ke aupuni mokuʻāina o Hawaiʻi e hoʻonā i ka hoʻopiʻi o kekahi mau ʻŌiwi Hawaiʻi e kali ana ʻo ka loaʻa mai o ka ʻāina hoʻopulapula Hawaiʻi. He 2,700 mau kānaka a ʻoi aku a emi mai paha ma ka ʻaoʻao hoʻopiʻi, akā, na Leona Kalima a me kekahi mau mea hoʻopiʻi ʻē aʻe ʻelua i waiho i mua o ka ʻaha hoʻokolokolo ma muli o ka hoʻokō ʻole ʻana o ke Keʻena ʻĀina Hoʻopulapula Hawaiʻi i kona kuleana, ʻo ia hoʻi, ʻo ka hāʻawi ʻana i ʻāina na nā ʻŌiwi i noi ma loko o ka manawa pono. Ma ka makahiki 1999 i waiho ʻia ai ka hoʻopiʻi a ua hala i ke ala hoʻi ʻole mai ma kahi o nā mea hoʻopiʻi he 950. Noi aku nei nā loio o ke aupuni mokuʻāina o Hawaiʻi i ka ʻAha ʻŌlelo Kūloko, e hoʻokaʻawale ʻia he $328 miliona kālā no ka hoʻonā ʻana i ia hoʻopiʻi.
E alualu ana ʻo Jill Tokuda i ke kūlana hope kiaʻāina ma ke koho wae moho Kemokalaka e hiki mai ana. Akā, loli ihola kona manaʻo, a i kēia lā, waiho ihola ʻo ia i nā palapala e pono ai kona alualu ʻana i ke kūlana lunamakaʻāinana ʻAmelika Hui Pū a ka Lunamakaʻāinana Kai Kahele e noho nei. ʻO Tokuda, he kenekoa kūloko ʻo ia ma mua.
Eia mai kā kākou ʻōlelo noʻeau,
Hoʻokuʻi a kole ka lae.
He ʻōlelo kēia no ke kanaka i pilikia.
Ke Aolama 