ʻAʻole e hoʻopiʻi ʻia kekahi mau mākaʻi i manaʻo ʻia, he hoʻomāino kūloko ka hana, e ka loio hoʻopiʻi.
ʻO ia aʻela kekahi poʻo nūhou o kēia lā, ka lā 29 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.
Ua hopu ʻia kekahi kopala o ke Keʻena Mākaʻi o Honolulu i ka lā ʻumi kūmāhiku o ka mahina ʻo ʻApelila ma Kāneʻohe no kona hoʻohuoi ʻia, ua hoʻomāino ʻo ia i kekahi mea e noho pū ana ma kona wahi noho, a hoʻopaʻahao aku ma ka hale a ʻākeʻakeʻa nō hoʻi i ka hōʻike ʻana i ka mākaʻi no kahi kalaima. ʻO Roland Masao Kam ka inoa o ua kopala lā. Hōʻole ihola naʻe ka loio hoʻopiʻi i ka hoʻopiʻi ʻana iā Kam. A i ka lā ʻumi kūmālima o ʻApelila, hopu ʻia kekahi mākaʻi, ʻo Sterling E.K. Naki kona inoa, no ka manaʻo, ua hoʻomāino ʻo ia i kekahi mea e noho pū ana. A hōʻole nō hoʻi ka loio hoʻopiʻi, ʻaʻole e hoʻopiʻi ʻia ʻo Naki. A hōʻike mai ke keʻena o ka loio hoʻopiʻi, i hōʻole ʻia ka hoʻopiʻi ʻia ʻana o Naki a me Kam no ka lawa ʻole o nā hōʻike e hoʻāhewa ʻia ai lāua me ke kānalua ʻole.
E lilo ana he $600,000 i ke Keʻena ʻĀina Hoʻopulapula Hawaiʻi no ke kūkulu ʻia ʻana o nā ʻāina hoʻopulapula a mākaukau a no ka hāʻawi ʻana i nā mea hoʻokahu ʻia he 1,120 a ʻoi aku a emi mai no ka uku ʻana i ka uku hoʻolimalima a me ka molaki paha. ʻO nā mea hoʻokahu ʻia e koho i ke kālā, ʻaʻole e lilo ka ʻāina hoʻopulapula iā lākou. Ma hope o kekahi mau koho ʻana ma ka ʻAha ʻŌlelo Kūloko, e hoʻouna ʻia ana ka Pila Hale 2511 i ke Kiaʻāina David Ige no ka pūlima ʻana.
Eia mai kā kākou ʻōlelo noʻeau,
ʻŌlelo i ke aka ka hele hoʻokahi.
No ka mehameha o ke kanaka ke hele hoʻokahi.
Ke Aolama 