ʻO nā Wāhine Ānuenue pōpō paʻipaʻi kahakai kekahi ma ka Hoʻokūkū Inoa Moho Nui.
ʻO ia aʻela kekahi poʻo nūhou o kēia lā, ka lā 2 o Mei, he Pōʻakahi. Welina e nā makamaka. ʻO Ke Aolama kēia a penei ka nūhou.
He ʻekolu koe moho e alualu ana i ke kūlana kahu kula nui o Hawaiʻi nei. ʻO Keith Hayashi ke kahu kula nui kūikawā, a ʻo ia kekahi o nā moho hope loa ʻekolu. ʻO Darrel Galera kekahi. He mea hoʻonaʻauao ʻo ia no nā kumu kula aupuni o Hawaiʻi no nā makahiki he 40. ʻO ke kolu o ka moho, ʻo ia ʻo Caprice Young. ʻO ia ka pelekikena o ka Education Growth Group ma ke Kūlanakauhale o nā ʻĀnela.
Ua hāʻule iho nei nā Wāhine Ānuenue iā Cal Poly ma ka puni inoa moho pōpō paʻipaʻi kahakai o ka ʻAhahui Komohana Nui. Akā, ma ka ʻaoʻao pōmaikaʻi naʻe, ua koho ʻia ʻo Hawaiʻi, ʻo ia kekahi ma ka Hoʻokūkū Inoa Moho Pōpō Paʻipaʻi o ka ʻAhahui ʻĀlapa o nā Kulanui o ʻAmelika Hui Pū ʻIa. Ma ka puni mua o ia hoʻokūkū, e kūʻē aku ana ʻo Hawaiʻi iā Loyola Marymount. Ma ke kakahiaka ia o ka Pōʻakolu.
E pāʻani pōpō pekupeku ana ʻo Cortez Davis a me Gene Pryor ma ke ʻano he loea ma ke Kuʻikahi Pōpō Pekupeku Aupuni. He mau mea pāʻani pōpō pekupeku lāua no ke Kulanui o Hawaiʻi ma mua. ʻO Davis, hana aku nei he palapala ʻaelike me Denver. A ʻo Pryor, e pūlima ʻo ia i ka palapala ʻaelike me Kansas City.
Eia mai kā kākou ʻōlelo noʻeau,
He ʻōpū hālau.
He ʻōlelo kēia no ke kanaka ʻoluʻolu, heahea, a lokomaikaʻi.
Ke Aolama 