05-04-22

E pāpā ʻia ana paha, ʻaʻole e hoʻohemo keiki ma nā mokuʻāina he nui o ʻAmelika Hui Pū ʻIa.

ʻO ia aʻela kekahi poʻo nūhou o kēia lā, ka lā 4 o Mei, he Pōʻakolu. Welina e nā makamaka. ʻO Ke Aolama kēia a penei ka nūhou.

Hoʻolaha hewa ʻia aku nei nā mea o ke kākau mua o kahi ʻōlelo hoʻoholo a ka ʻAha Hoʻokolokolo Kiʻekiʻe o ʻAmelika Hui Pū ʻIa e hoʻohuli ana i ka hopena o ka hihia kahi e kūʻē ana ʻo Roe iā Wade ma ka makahiki 1973. ʻAʻole paha ia he pilikia ma Hawaiʻi nei, ʻoiai, i ka makahiki 1970, ma mua o ia hihia o Roe me Wade, ua lilo ʻo Hawaiʻi, ʻo ia ka mokuʻāina mua kahi i kū ai ka hoʻohemo keiki ʻana i ke kānāwai. Akā, wahi a Planned Parenthood, inā hoʻohuli ʻiʻo ʻia nō ua hihia lā, ua mākaukau kekahi mau mokuʻāina he 26 o ʻAmelika Hui Pū ʻIa, e pāpā koke aku i ka hoʻohemo keiki ʻana.

Holo mua aku nei nā Kāne Ānuenue ma ka Hoʻokūkū Inoa Moho Pōpō Paʻipaʻi. Lanakila aku nei ʻo Hawaiʻi ma luna o North Greenville i ka Pōʻalua nei ma loko o nā pāʻani he ʻekolu wale nō. E kūʻē aku ana ʻo Hawaiʻi iā Ball State i ka Pōʻahā. Aia i ka hapalua hola ʻehā o ka ʻauinalā. Ma Ianuali, ua eo ʻo Hawaiʻi i nā Manu ʻUlaʻula o Ball State ʻelua manawa. Akā, i ia wā, ʻaʻole i pāʻani ʻo Jakob Thelle a me Guilherme Voss ma muli o ko lāua loaʻa i ka maʻi kolona. A ʻo kekahi hoʻokūkū o ka Pōʻahā, e kūʻē aku ana ʻo Kekaha Loa iā UCLA ma ka hola 2:00 o ka ʻauinalā. A ʻo nā lanakila, e kūʻē ana ma ka puni inoa moho ma ka lā ʻehiku o Mei.

Eia mai kā kākou ʻōlelo noʻeau,

ʻO Hinaiaʻeleʻele ka malama, ʻāluka ka pala a ka ʻōhiʻa.

Ma Hinaiaʻeleʻele, pala ka ʻōhiʻa ʻai ma nā wahi a pau.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: